Ала Пугачева со своите антивоени апели му наштети на рускиот претседател Владимир Путин. На Кремљ му требаше речиси цел ден да собере храброст да и одговори на пејачката. Дали луѓето на Путин се исплашија?
Ала Пугачева во својата последна објава (писмо) бара да биде прогласена за „странски агент“. Таа, исто така, зазеде јасен антивоен став, повикувајќи на „запирање на смртта на нашите момчиња за илузорни цели кои ја прават земјата аутсајдер и го отежнуваат животот на нашите граѓани“. Дмитриј Песков, прес-секретарот на рускиот претседател Владимир Путин, одби да ја коментира нејзината изјава. Од што толку се плаши Кремљ?
Ала Пугачева, симболот на советската и руската сцена, отворено се соочи со руските власти. Уште во времето на Леонид Брежњев, имаше шега дека во далечна иднина овој советски генерален секретар ќе се нарекува „истакната политичка фигура од ерата на Пугачева“. Сега се поставува прашањето дали истото нема да се случи и со Владимир Путин. Де факто сме сведоци на натпревар: кој од двајцата – поранешниот агент на КГБ или пејачката, коиј ја започнаа својата кариера приближно во исто време, во времето на Брежњев – ќе стане симбол на сегашната ера.
На социјалните мрежи луѓето се шегуваат дека најверојатен противник и силен кандидат против Путин би можел да биде сопругот на Пугачева, Максим Галкин. Дури го споредуваат со Володимир Зеленски. Но, ако треба сериозно да зборуваме за темата – тоа е всушност судир на два света.
Првиот е „рускиот свет“ на Путин, кој повикува на ликвидација на Украина, водење војна до победнички крај, без разлика колку жртви има, и на крајот изградба на замислениот Советски Сојуз 2.0.
Вториот свет е оној на вистинскиот доцен СССР, кој од почетокот на војната умре во ужас од она што се случува, јавно не го критикува Путин, но очигледно и не го поддржува. И сега, во лицето на Пугачева, овој свет им даде израз на своите емоции. Нејзиниот сигнал, емитуван на забранетата во Русија социјална мрежа Инстаграм, секако стигна и до социјалната мрежа „Однокласници“ („Соученици“), во која инаку либералната интелигенција нема шанси да упадне. Ова е нуклеарниот електорат на Путин, кој сè уште не е подготвен да слуша за Буча, но е способен да ја сфати бесмисленоста на војната како масакр.
Очигледно, противниците на војната се многу повеќе
Разочарувањето и заморот на руското општество, чувството на слабост и неединство меѓу противниците на војната на Путин се гледаа во изјавата на Пугачева како во огледало. Некои дури мислат дека руските либерали сите надежи за иднината ги положиле во популарната пејачка.
Меѓутоа, во реалноста, тие веројатно за прв пат по рускиот напад на Украина имаат чувство дека не се сами. И дека кругот на противници на воената агресија е многу поширок од тесното интелектуално опозициско општество.
Притоа, Пугачева понуди и нов јазик: таа ги наведе алтернативните интереси на Русија, освен оние на Путин. Тие се едноставни и разбирливи, можат далеку полесно да се објаснат логично отколку да се докаже потребата од т.н. „специјална операција“. Или од мобилизацијата за која се повикуваат поддржувачите на војната во Русија.
Сепак, емотивниот одговор на изјавата на Ала Пугачева дефинитивно не одговара на нејзините размери. Воопшто не е сигурно дека изјавата на пејачката ќе има сериозни последици. Згора на тоа, Пугачева има огромно искуство во справување со различни авторитети, што во минатото и овозможи практично да го скрши остатокот од руската поп сцена. Важно е да не се очекува чудо од објава на Инстаграм, туку да се забележи дека Пугачева со отворената транзиција на антивоени позиции остави симболичен белег. И под стариот СССР, кој сега е со либералите, и под обидот на Путин да го обнови Советскиот Сојуз, против кој постепено се обединуваат сите оние кои сакаат Русија да има иднина.
На Кремљ му требаше речиси цел ден да собере сили за одмазднички удар против „примадоната“, како што печатот понекогаш ја нарекува Пугачева. Но, никогаш не смислиле нешто посериозно од тоа дека таа е стара. Сепак, овој аргумент беше релевантен во 1990-тите, а не сега, а згора на тоа се рикошетира и кај самиот Путин. Наспроти неговото потекло, дури и длабоко „советските“ Пугачева и Галкин изгледаат свежо и модерно. Тие ги упатуваат луѓето кон иднината, додека Путин зборува само за идеалното минато.
