Годинава 106 милиони долари од САД и 10 милиони евра од ЕУ за модернизација на Армијата
Една придобивка од процесот на европската интеграција е дека се отвораат нови фондови во делот на одбраната, изјави министерката Славјанка Петровска во денешното гостување во „Студио 10“ на ТВ24, истакнувајќи дека 10 милиони евра од Европскиот мировен фонд се достапни за Министерството за одбрана за купување на различен вид на опрема.
Во контекст на сојузничката поддршка од Соединетите Американски Држави, Петровска информираше за вкупниот износ кој Северна Македонија го има добиено годинава од САД за процесот на опремување и модернизација на Армијата.
„ САД за помалку од 10 месеци донесоа одлука за финансиски средства од вкупно 106 милиони долари, поддршка за процесот на модернизација на Армијата“, потенцираше министерката Петровска, објаснувајќи дека не станува збор за заем или кредит кој ќе треба да го вратиме.
Овие средства дополнително ќе го зајакнат капацитетот на Армијата за модернизација – процес за кој се предвидени над 30% од буџетот за одбраната за 2023 година.
Во контекст на опремувањето и модернизацијата на Армијата, министерката Славјанка Петровска на еодамнешната Топ тема истакна дека неперспективната опрема во Армијата забрзано се менува со нова и софистицирана опрема, што е поддржано и од буџетот на Армијата кој согласно плановите до 2024 година ќе изнесува 2 проценти од бруто домашниот производ.
Оваа година, истакна Петровска, одбранбениот буџет изнесува 1,77 проценти од БДП, односно околу 220 милиони евра од кои 30 проценти се одвојуваат за модернизација и опремување. Пристигната е првата пратка од Лесните оклопни возила, JLTV, во тек е набавка на возила Stryker, а потпишан е и повеќегодишен договор за набавка на француски системи за противвоздушна одбрана, информираше Петровска.
Во процесот на модернизација, опремување и развој на Армијата, Северна Македонија доби и сојузничка поддршка од САД со 78 милиони долари, средства кои ќе се наменат и за развој на капацитетите за сајбер одбрана.
Министерката Славјанка Петровска на гостувањето во Топ тема се осврна на Измените на законот за служба во Армијата кои беа договорени во дијалог со сите четири синдикати и во кои се вклучени платите и покачувањата и други придобивки и бенефиции. Од утре припадниците на Армијата добиваат покачување на платите од 2.000 денари, а исплатата на отпремнината во висина од две просечни плати, но не помалку од 1.000 евра за секоја година помината во Армијата започнува следната недела.
Се отвара уште една можност за сите оние професионални војници кои ќе наполнат 45 години, со што им престанува нивниот договор за работа како професионални војници, да земат отпремнина, да останат во Министерството или пак да бидат превземени во некоја од другите институции“, рече Петровска.
Министерката истакна дека пресметките се веќе вкалкулирани во буџетот и од следната недела ќе започне исплатата на отпремнина за професионални војници кои ги исполнуваат условите и доставиле барање за отпремнина.
