Поранешниот амбасадор на Македонија во Грција вели дека кога ќе го освоите Монт Еверест, тоа никој не може да ви го оспори
Ако до јуни ги исполниме критериумите околу законот за јавното обвинителство, со кој се регулира и статусот на СЈО, изборот на нови судии, решавање на одредени случаи, реално е да очекуваме дека ќе добиеме датум за преговори со Европската унија.
Ова го истакна денеска првиот амбасадор во Грција, Љупчо Арсовски, одговарајќи на новинарско прашање дали за него е реално да добиеме датум на Советот на ЕУ во јуни или пак поголема е веројатноста дека тоа би се случило во октомври.
– Ако сме чекале 30 години, за мене не е страшно тоа да биде и во октомври, рече Арсовски и додаде дека смета оти сега ова ќе биде тема за партиски препукувања и уценувања во кампањата за претседателските избори, со желба да се добијат повеќе гласови.
– Ние мора професионално да работиме во однос на исполнување на критериумите. Ако до јуни ги исполниме критериумите околу СЈО, нови судии, одредени случаи датумот не ни бега, рече поранешниот амбасадор денеска по основачко собрание на здружението „Совет на амбасадори“, кое претставуваа независно непартиско, непрофитабилно здружение на амбасадори и поранешни министри за надворешни работи.
Вели дека него оптимизмот за почеток на преговори со ЕУ никогаш не го напуштил, но додаде дека предвид треба да се имаат и одредени тајминзи во самата Унија. Во ЕУ во мај се одржуваат избори за нов состав на Европскиот парламент, што како што посочи Арсовски, ќе доведе до промени и во европскиот кадар.
– Очекувам позитивен факт, меѓутоа еве и ние се наоѓаме во изборна кампања за претседател, каде се спомнуваат различни работи. Ќе ни поминат и април и мај, а ние треба да ги сработиме критериумите кои Европа ги бара. Тоа се медиумите, судството, институциите кои се преоптоварија со партиски вработувања, мора да дојде до израз квалитетот. Кога одите во Брисел не ве прашуваат од која партија сте, туку ве прашуваат дали сте ја завршиле домашната задача, нагласи поранешниот амбасадор.
Во врска со тоа дали Договорот од Преспа е реверзибилен, со оглед на најавите на кандидатката за претседател поддржана од ВМРО-ДПМНЕ, Гордана Силјановска, која најави и уставна клаузула за заштита на името, Арсовски нагласи дека смета оти тоа се само предизборни манипулации.
– Многу е тешко еден процес да вратите назад. Освоената планина еднаш сте ја освоиле и вие сте таму на планината. Кога ќе го освоите Монт Еверест, тоа никој не може да ви го оспори. Се работи за одлука на народот, ако некогаш народите одлучат нешто друго тоа е друга работа. Мислам дека е залудно и смешно квалитетни луѓе да презетнираат такви форми на популистичко приближување до народот дека ние повторно ќе го смениме името и ќе го вратите и ќе го поништиме. Тоа така не оди во меѓународните односи, појасни дипломатот.
На прашањето дали предзвик за новоформираниот Совет ќе биде Турција, односно своевидно барање на листа на членови на ФЕТО, во замена за ратификацијата на Протоколот за членство во НАТО од турска страна, Арсовски рече дека земјава се сочувала со вакви слични ситуации и со други соседи.
– Но одредени земји кога притискаат помала земја постојат и друг тип механизми и во НАТО и од другите држави, кои можат да ја притиснат дотичната земја, без разлика дали станува збор за Грција, Турција, Бугарија…Се работи за односот за дигнитет на една земја и мешање во внатрешните работи на земјата, додаде амбасадорот Арсовски.
Инаку, на Универзитетот ФОН во Скопје во понеделникот се одржа основачко собрание на здружението „Совет на амбасадори“, како независно здружение од државните институции, непартиско, непрофитабилно здружение на амбасадори и поранешни министри за надворешни работи.
Целта на Здружението е преку своите активности да помогне во креирање и успешното имплементирање на надворешната регионална и меѓународна билатерална и мултилатерална политика, ЕУ и НАТО интеграцциите.
Советот ќе се залага за зајакнување на капацитетите на институциите кои ја креираат и практикуваат надворешната политика, со унапредување на билатералните политички, економски и културни односи со трети земји, развој на нашата дипломатска мрежа и нејзиното успешно функционирање, активно и успешно учество на нашите дипломатски претставници во мултилатералните организации и меѓународните конференции.
– Во своето дејствување Советот ќе соработува со државните институции надлежни за креирање и спроведување на надворешната политика, со образовните и научните институции, со невладините организации, со стопанските комори, како и со слични европски и меѓународни здруженија, соопштија од Иницијативен одбор на ,,Советот на амбасадори“.
На Основачкото собрание, како што е најавено, ќе биде усвоен нацрт – „Статутот на Советот на амбасадори“, предлог мисијата и предлог програмата, а ќе биде избран Извршниот одбор на здружението, претседател и потпретседатели на Советот.
