Политичката акција на Русија на Балканот за поранешниот американски генерал Весли Кларк е „балканска игра“, додека за професорот од Универзитетскиот колеџ во Лондон, Марк Галеоти, тоа е руска политичко-воена машинерија
ЕМИЛ ЗЛАТКОВ
Балканот повторно и многу лесно може да стане кризно тло, бидејќи е регион кој е на тектонската плоча на човековата раса, каде цивилизациите од секогаш се судирале и денеска се судираат. Со таа разлика, велат експертите, што овој пат тоа е модерно, политички, но никако не смее да се заспие и на двете очи оти некои нови мешања во регионалните односи и во прозападните желби на Балканот имаат можна тенденција за пламнување на конфликти.
Или, како што вели поранешниот американски генерал Весли Кларк, кога на Балканот оро играат Русија, Турција и Кина, тогаш ЕУ и НАТО мораат да бидат брзи и енергични, бидејќи тие се стратешка цел на Македонија, Косово, БиХ, Албанија…
„Лутите зборови и агресивните дела можат да доведат до конфликти на Балканот многу побрзо одошто каде било на друго место во светот. И треба да бидеме загрижени. Треба што побрзо да го внесеме Западен Балкан напред во западната и во трансатлантската цивилизација“, вели генералот Кларк, во изјава за неколку регионални медиуми.
Кларк: Москва се судира и со Анкара на Балканот
Кларк смета дека не само што Русија има своја „битка“ на Балканот за ширење на своето политичко влијание, туку бие битка и со други ривали кои не се од Западот.
„Турција и Русија често се судираат меѓусебно на Балканот. Тоа не се случува во Босна и Херцеговина, во Романија, во Бугарија и во другите држави“, додава Кларк.
Што се однесува до влијанието на Кина, аналитичарите велат дека Пекинг на Балканот доаѓа со инвестициски фондови и дека не треба никој да се изненади ако тие фондови дојдат со политички врски прикачени за нив.
„Кога носите кинески пари добивате и кинеско влијание. Но не е само Кина, Сите три земји, Русија, Турција и Кина играат т.н. балканска игра“, појаснува поранешниот генерал.
Таа балканска политичка игра, или како што дел од експертите велат „балканско оро“, во анализите на Марк Галеоти од Универзитетскиот колеџ во Лондон, е отсликано како нешто многу пожестоко. Московската политика на Балканот против Западот и балканските евроатлантски интеграции според Галеоти е „руска политичко-воена машинерија“.
„Таа руска политичко-воена машинерија е ефикасна поради нејзината стратешка цел – да се ослабне капацитетот на противникот, да се оневозможи тој да се спротивстави на обидите за искористување на неговата ранливост, и особено поткопување на неговото политичко и граѓанско единство“, вели Галеоти.
Поради сето тоа, вели Галеоти, Западот, сакал или не, е во своевидна војна, војна која ја диктираат моменталните околности.
