Националната развојна стратегија(НРС) отвора пат кон долгорочен развој, стабилност и просперитет за сите наши граѓани и граѓанки. Нејзиното усвојување е повеќе од обична политичка одлука – тоа е пресвртна точка, момент кој бара зрелост, одговорност и најважно, консензус – рече пратеникот од СДСМ, Фатмир Битиќи на 17-та седница на Собранието на Република Северна Македонија
На 17-та седница на Собранието на РСМ се расправаше, меѓу другото и за Националната развојна стратегија 2024-2044 година. На неа дискутираше и Фатмир Битиќи екс-заменик премиер за економски ппрашањач При тоа Битиќи потсети дека пред неполни четири години, со голема одговорност и посветеност го започнал процесот на креирање на НРС.
„Во тој момент, со јасна визија дека, но најважно, го отворивме процесот за пошироката јавност, вклучувајќи го гласот на илјадници сограѓани граѓани. Над 14.000 граѓани од различни сегменти на нашето општество, од академската заедница, граѓанскиот сектор, бизнис заедницата и сите политички партии, придонесоа во неговото создавање. Тоа значи дека ова не е само стратегија на една влада или една партија. Ова е стратегија од сите нас за сите нас“, рече пратеникот од СДСМ, Битиќи.
Тој потсети дека за време на власта на СДСМ е поставен темелот за овој документ кој, со тек на времето, прерасна во најважната стратешка рамка за иднината на нашата држава.
„Денес, со огромна радост и чувство на исполнетост, како пратеник го дочекав финализирањето на стратегијата. Овој документ одразувајќи ги колективните аспирации успеа да ги обедини различните гласови и интереси. Сега, како претставник на граѓаните и граѓанките, со уште поголема увереност можам да кажам дека ова е патот кој ќе ја води нашата земја кон долгорочен и одржлив развој. Консензусот што го бараме денес не е само политички чин. Тој е израз на нашата посветеност кон демократските вредности. Со оваа стратегија покажуваме дека ги цениме различните мислења и сме подготвени да ги интегрираме во еден заеднички план. Ние, како пратеници, имаме обврска да го претставуваме гласот на граѓаните и граѓанките, кои преку процесот на создавање на НРС јасно ни порачаа што очекуваат од нас: очекуваат консензус, очекуваат соработка и очекуваат визија која ќе ги надмине тековните политички битки и поделби“, рече Битиќи.
Во своето обраќање во Собранието, пратеникот Битиќи појасни дека консензуалното усвојување на НРС ќе има и долгорочни политички импликации, затоа што ова не е само стратегија која ќе помогне да се решат економските предизвици.
„Ова е стратегија која ќе ја засили довербата во нашиот политички систем. Со тоа што сите политички партии учествуваа во нејзиното создавање, ние покажавме дека сме способни за компромис и соработка. А компромисот не е слабост – напротив, тоа е израз на политичка зрелост и одговорност“, рече Битиќи и дополни дека пратениците имаат можност да покажат дека за прашања кои се од суштинско значење за иднината на државата, може да работат заедно и даги надминат партиските интереси и да се усвои документ кој ќе биде од корист за сите.
Битиќи истакна дека една од важните лекции што треба да се научи од процесот на создавање на НРС, е дека инклузивноста не е само средство за постигнување на цели.
„Инклузивноста е основен принцип на демократскиот систем, кој гарантира дека секој глас е слушнат и секој интерес е земен предвид. Ова не треба да се ограничи само на институциите – оваа вредност треба да се преслика и во нашите политички партии, во нашиот секојдневен живот“, порача од собраниската говорница Фатмир Битиќи.
