Аналена Бербок бара ЕУ да го напушти принципот на консензус, особено за Балканот. Ескобар, кој беше во Охрид деновиве, потенцираше дека самиот кандидатски стаус ќе донесе сериозни придобивки за народот во Македонија
Шефицата на германската дипломатија Аналена Бербок изјави дека на Европската унија и е потребна стратешка акција по прашањето за проширувањето кон Балканот и интеграцијата на Украина и Молдавија. Таа изјави и дека ЕУ мора да ги реформира институциите, особено да се откаже од принципот на консензус во надворешната политика.
„Украина ги штити и вредностите на Европа. Затоа ЕУ не може да ја тресна вратата за Украина. Што се однесува до статусот на кандидат, повеќе е прашање дали сме способни да дејствуваме стратешки, а не бирократски, во овој историски момент“, рече Бербок.
Според неа, војната во Украина е историски пресврт на нашиот континент.
„Одлуките што ќе ги донесеме ќе ги одредуваат односите во Европа уште долго време, дури и ако процесот на пристапување е долг и тежок. Истото важи и за нашите пријатели во Молдавија“, напиша германската министерка на Твитер.
Таа ја спомена и потребата од преземање натамошни чекори во интеграцијата на балканските земји во ЕУ, „во спротивно Русија ќе ги преземе тие чекори“.
Бербок изјави дека нема да биде доволно само да се постават дополнителни столчиња во Брисел за состаноците на претставниците на земјите-членки.
„Време е ЕУ да продолжи да се гради, вклучително и напуштање на принципот на консензус во надворешната политика“, напиша таа.
Принципот на консензус се користи во Советот на ЕУ при донесување одлуки во многу области на политиката. Посебно се користи во надворешно-политичките одлуки кои се обврзувачки за цела ЕУ – во овој случај потребна е согласност од сите земји-учеснички, што често доведува до одложување на одлучувањето или нивна значајна ревизија. Таков е и случајот со одредувањето на датумот за првата меѓувладина конференција меѓу ЕУ и Македонија.
Самиот кандидатски статус создава големи придобивки за народот. До европските пријатели во јавноста – Западен Балкан е дел од тој проект, Западен Балкан е географски, економски, културно и историски европски. Ги делите тие вредности, имате солидни партнери во НАТО и сте одлични билатерални партнери на САД, изјави Габриел Ескобар, заменик-помошникот на државниот секретар на Соединетите Американски Држави за европски и евроазиски прашања и специјален претставник за Западен Балкан на попладневната сесија на тема „Западен Балкан – управување на бродот во турбулентни времиња“ што се одржа во рамки на Преспа форумот за дијалог 2022.
Иако луѓето, како што посочи Ескобар, се фокусираат на конкретен процес во конкретна политичка рамка, има многу прогрес што се случува на други места преку трговски, билатерални канали, мултилатерални канали и во сите нив, како што рече, Западен Балкан успева.
