Ова е прашање што јавно го поставуваат од ДУИ, во врска со досегашната истрага за една од најголемите трагедии во земјата
Од ДУИ бараат одговори на неколку прашања, меѓу кои и дали е вистина дека агенцијата Рубикон уценува компании да ја ангажираат, повикувајќи се на нивната блиска поврзаност со високи партиски авторитети
Зошто Владата ги крие релациите со агенцијата „Рубикон“, која го обезбедувала т.н. кабаре во Кочани вечерта кога се случи трагедијата, прашуваат викендов од Демократската унија за интеграција (ДУИ).
Оттаму бараат целосна транспарентност за активностите на оваа агенција, која како што велат, била одговорна за безбедноста на т.н. кабаре во трагичната ноќ во Кочани.
„Затоа Владата има обврска да одговори кои се другите клиенти на ‘Рубикон‘. Дали имале регуларни безбедносни договори и лиценцирани обезбедувачи? Дали МВР некогаш извршило инспекција и контрола во оваа агенција? Дали оваа компанија се штити поради нејзините врски со власта? Дали е вистина дека агенцијата уценува компании да ја ангажираат, повикувајќи се на нивната блиска поврзаност со високи партиски авторитети?“, се вели во партиското соопштение.
Наместо да ја користи правадата за да напаѓа политички противници, според ДУИ, владата треба да преземе одговорност за своите неуспеси и за оние кои навистина се одговорни за оваа трагедија.
ДУИ бара непристрасна и целосна истрага за овој случај.
Во јавноста веќе се појавуваат сомнежи дека сопственикот на клубот „Пулс“ се грижел само за добивката од пијалоците, додека прашањето на организацијата и безбедноста на објектот ја препуштал на други заинтересирани, меѓу кои можел да има и „судир на наделжностите“.
Токму тука многумина бараат можни нови моменти во откривање на она што се случило во кобната ноќ во кочанското место за заабава.
