Треба да осигураме дека претседателот и Конгресот ја разбираат важноста на релацијата меѓу двете држави, рече демократската конгресменка Деби Дингел
МИЛЕНА ЃЕОРГИЕВА
Решавањето на спорот за името со Грција ќе придонесе кон безбедна Европа и стабилна меѓународна клима, вели демократската конгресменка од Мичиген Деби Дингел, нагласувајќи ја долгата и важна врска меѓу народот на Македонија и САД.
„Македонија ќе биде 30-та држава која ќе влезе во НАТО. Се надевам дека како што се движиме напред, преку заедничка работа и комуникација ќе овозможиме таа што побрзо да влезе во Алијансата. Тоа е особено значајно за светската безбедност“, изјави Дингел во интервју за Гласот на Америка.
Таа верува дека ако државите, вклучувајќи ја и Македонија, заедно работат во коалиција како НАТО, ефективно ќе придонесат во адресирање на многу сложени прашања, кои се значајни за одржување на светската стабилност.
„Со станувањето членка во НАТО Македонија ќе работи со други 29 држави на безбедноста на регионот и на други клучни прашања“, рече таа.
Дингел е силен поддржувач на НАТО оти смета дека преку заедничка работа и одговорност на меѓународна сцена државите се посилни.
Сепак верува дека треба да се работи на информирање на луѓето за предизвиците кои доаѓаат од Русија.
„Светот денес се наоѓа во многу комплицирана ситуација. Имаме претседател кој треба да ја разбере важната улога која САД ја имаат на глобалната сцена. Треба да работиме со пријателите во Македонија да осигураме дека претседателот и Конгресот ја разбираат важноста на оваа релација“, смета Дингел.
Истакна дека не го поддржува ставот на претседателот Доналд Трамп за повлекување на САД од НАТО.
Вели дека Алијансата претставува важна платформа да се разговара со други држави за различни прашања и за глобални предизвици, што на сите, вклучувајќи ја и Македонија, ќе им донесе економска стабилност и безбедна иднина.
Историското гласање за уставните измени е чекор напред за Македонија на економски, политички и на безбедносен план, вели Џонатан Кац од Германскиот маршалов фонд во Вашингтон.
„Договорот е дел од важен прогрес кој е направен изминативе неколку месеци, со кој се решава историски проблем што длабоко ги загрижува двете страни“, изјави Кац во интервју за Гласот на Америка.
Тој вели дека во моментов Грција се соочува со политички предизвици, но, верува оти заложбата на премиерот Алексис Ципрас ќе доведе до исполнување на грчкиот дел од Договорот од Преспа.
„Убеден сум дека Атина ќе продолжи да го исполнува Договорот од Преспа. Се разбира тоа нема да се случи без дебата и различни мислења, но, ако меѓународната заедница продолжи да го поддржува овој договор, а тоа се САД, ЕУ и партнерите во регионот, ќе видиме успех“, верува тој.
Сепак, вели тој, решението на проблемот со името е само еден дел од процесот, и оти следен чекор треба да биде исполнување на реформите за натамошна интеграција во евроатлантските институции.
„Да се обезбеди поддршка за справување со корупцијата, зацврстување на демократијата, како и да им се помогне на Македонија и на државите од Западен Балкан да ја зацврстат нивната безбедност“, смета Кац.
Според него, и Вашингтон и Брисел во наредните месеци треба да размислат како можат да и` помогнат на државата да се движи напред, како и да ги зацврстат односите меѓу Македонија и Грција да работат заедно во интерес на целиот регион.
Годинава се одбележуваат 70 години од постоење на НАТО, и Кац верува дека не постои подобра ситуација од оваа Македонија официјално да стане членка на Алијансата.
