Странец кој сака да се вгнезди на Островот треба да има 38 700 фунти за даможе да работи таму
Странските работници можат да имигрираат во ОК само ако имаат потпишан договор за повеќе од 38.700 фунти годишно. Оваа драстична мерка ја предлага британската влада. Министрите за внатрешни работи на Велика Британија и Руанда – Џејмс Клеверли и Винсент Бирута – потпишаа договор за депортација на мигранти.
Британија сака драстично да ја ограничи миграцијата во земјата и да го отежне пристигнувањето на странски работници. Британскиот министер за внатрешни работи Џејмс Клеверли најави дека во иднина квалификуваните странски работници ќе мора да исполнуваат построги критериуми за да можат да работат во Британија.
Досега требаше да потпишат договор за годишна плата од најмалку 26.200 британски фунти, потсетува АРД. Според промените што Клеверли ги објави во парламентот во понеделникот, ќе треба да имаат сигурен приход од 38.700 фунти (или 45.150 евра) за да имигрираат во земјата. Негувателите нема да мора да го исполнуваат овој критериум, но ним, како и студентите, нема да им биде дозволено да ги земат своите семејства со себе кога се преселуваат во Обединетото кралство.
ВЛАДА НАСПРОТИ БИЗНИС Клеверли објави дека нето миграцијата во земјата го забележала својот најголем пад во историјата на ОК. Според него, во земјаТа ќе влезат околу 300 илјади мигранти помалку, пишува АРД. „Доста е“, напиша премиерот Риши Сунак во гостинската објава за таблоидот „Сан“. Тврдокорните, како што е поранешната министерка за надворешни работи, Суела Браверман, дури се залагаше за построги мерки. Истото важи и за претставниците на крајната десница на конзервативната партија.
Експертите го критикуваат планот на британската влада. Еден европски дипломат, цитиран од АРД, вели дека сигналот што им се дава на квалификуваните работници е дека тие едноставно не се барани. Истовремено, Британија страда од недостиг на персонал. Нил Карбери од Конфедерацијата за вработување и регрутирање REC коментира за „Фајненшл тајмс“ дека интересите на бизнисот и економијата на земјата остануваат во втор план поради внатрешните проблеми на Конзервативната партија.
ЛОНДОН СЕПАК ЌЕ ВРАЌА МИГРАНТИ ВО РУАНДА Во исто време, Клеверли и министерот за надворешни работи на Руанда, Винсент Бирута потпишаа договор според кој мигрантите кои илегално влегле во Британија ќе бидат испратени во оваа африканска земја. За возврат, Руана ќе добие првична исплата од 163 милиони евра и ветување дека Лондон ќе обезбеди средства за згрижување на депортираните мигранти.
Минатиот месец британскиот Врховен суд го отфрли воведувањето на таква практика, потсетува АРД. Според судската одлука, ваквата политика би била спротивна на меѓународното право. Сепак, властите во Лондон сакаат да ја заобиколат одлуката преку новиот договор со властите во Руанда. Според него, авторитарните власти во африканската земја се обврзуваат да не ги депортираат барателите на азил во земјите од кои доаѓаат. Во случај тоа да стане неопходно, одлуката мора да се донесе заедно со британските правосудни органи, објаснува АРД.
ДАЛИ РУАНДА Е БЕЗБЕДНА ЗЕМЈА? Британскиот парламент сега мора да ја прогласи Руанда за безбедна трета земја. Набљудувачите стравуваат дека британскиот премиер Риши Сунак може да се повлече од Европската конвенција за човекови права за да избегне противење од Стразбур. Десното крило на Конзервативната партија врши силен притисок врз Сунак значително да ја намали нето имиграцијата, пишува АРД.
Британскиот суд исто така не ја категоризира Руанда како безбедна трета земја. Затоа тој сметаше дека договорот не е во согласност со меѓународните обврски на ОК, бидејќи ќе биде можно Руанда да депортира луѓе во региони каде што ќе се соочат со прогон.
Владата нагласи дека сака да ги депортира првите баратели на азил во Руанда пред следните избори. Се уште не е јасно кога тоа ќе се случи. Шпекулациите се за мај или октомври 2024 година, но сè уште не е јасно дали авионот со депортирани лица во Руанда некогаш ќе полета, објаснува АРД. Дури и министерот за внатрешни работи Клеверли не беше подготвен да се посвети на одреден датум.
