ЈП ‘Комунална хигиена’ практично не функционира, а купишта ѓубре се натрупани околу контејнерите. Ова веќе не е прашање на естетика, туку на јавно здравје – пишува докторот
Епидемиологот д-р Драган Даниловски предупред дека Скопје се наоѓа во состојба на јавно-здравствена закана без преседан, оценувајќи дека колапсот на системот за собирање отпад го довел градот до „точка без повраток“. Во својата објава на социјалните мрежи, тој порача дека „Рубиконот е преминат“, откако купиштата ѓубре, глодарите и неодговорноста на институциите веќе го загрозуваат здравјето на граѓаните.
ЈП ‘Комунална хигиена’ практично не функционира, а купишта ѓубре се натрупани околу контејнерите. Ова веќе не е прашање на естетика, туку на јавно здравје“, пишува Даниловски. Според него, последниот инцидент – каснување на дете од глушец во училишен двор – е симболичен доказ за системскиот распад.
Во анализата тој предупредува дека натрупаниот отпад создал идеални услови за развој и размножување на глодари, преносители на сериозни заразни болести како лептоспироза, хантавирус и дури бубонска чума. „Стаорците се размножуваат експоненцијално – за само 18 месеци, еден пар може да даде повеќе од еден милион потомци. Во Скопје сите предуслови се исполнети: храна, вода и засолниште“, вели Даниловски.
Тој предупредува дека епидемиолошките ризици растат експоненцијално и потсетува на историски примери кога ширењето на глодари довело до катастрофални последици. „Во Средниот век, црната смрт однесе милиони животи. Денес имаме медицина и антибиотици, но би било неодговорно да дозволиме создавање биолошки резервоар на зараза во срцето на главниот град“, наведува тој.
Даниловски смета дека каснувањето на дете од глушец е „црвена линија што не смееше да се премине“, и повикува на итна реакција на сите надлежни институции. „Потребна е координирана интервенција, вклучително и можност за прогласување вонредна состојба на делови од градот – заради дезинфекција, дезинсекција и дератизација“, нагласува тој.
„Причините – организациски, политички или финансиски — стануваат ирелевантни кога се доведува во прашање здравјето и безбедноста на децата“, додава Даниловски, потсетувајќи дека правото на здравје е уставно загарантирано право на секој граѓанин.
(рацин.мк – иклусѕрацијата е на Глобус)
