С. Македонија заслужува да ги отпочне неодложно преговорите со ЕУ. Франција ќе биде внимателен и добронамерен партнер, порача Макрон пред работната вечера со Заев. Одржан и заднички германско-француски самит со заклучоци и за Западен Балкан
„Северна Македонија има аспирации за членство во ЕУ и Франција ве поддржува на тој пат“, му порача францускиот претседател Емануел Макрон на македонскиот премиер Зоран Заев пред Елисејската палата во Париз, каде имаа заедничка изјава пред работната вечера. Францускиот претседател изрази подготвеност да помогне за постигнување на компромис во спорот со Бугарија.
„Знаете дека Франција е понекогаш перципирана како тежок партнер и кој бара многу затоа што сакаме да бидеме чесен и искрен партнер. Знаеме дека кога заедно тргнуваме по еден пат, не сакаме за 5 или 10 години тој пат да изгледа невозможен. Затоа заедно со ЕУ ја предложивме новата методологија која што е по политичка, поефикасна и по веродостојна, за да може според неа да се водат преговорите за пристапување со земјите кандидати“, изјави Макрон.
Тој потсети дека во март 2020 беше донесена одлука да се отворат пристапните преговори со Северна Македонија.
„Време е да се конкретизира оваа одлука и ќе зборуваме за начините на работната вечера. Јас сум подготвен активно да ја поддржам потрагата по балансиран компромис со Бугарија, имајќи ги предвид важните реформи кои беа преземени под ваше раководство од 2017 година досега. Вашата земја заслужува да ги отпочне неодложно преговорите со ЕУ. Франција ќе биде внимателен и добронамерен партнер“, му порача Макрон на Заев.
Македонскиот премиер му се заблагодари на Макрон, во име на Владата и граѓаните на Северна Македонија за поддршката, посочувајќи дека денешната средба ги збогатува пријателските врски меѓу двете земји, во годината кога се одбележуваат 28 години од воспоставените дипломатски односи со Република Франција.
„Посебно место во развојот на француско-македонското пријателство имате и вие претседателе Макрон, со јавна поддршка за Договорот од Преспа. Пред нас е самитот на ЕС во јуни и тој е вистинска можност за чекор напред и решение за отргнување на блокадата на нашиот европски пат. Дијалогот носи решение“, изјави Заев.
Премиерот во објава на социјалните мрежи оцени дека станува збор за историски важна работна посета во Париз, на покана на претседателот Макрон. „Инспириран од една негова изјава пред студентите во Сорбона во која порача дека во Европа лежи нашиот идентитет и дека Европа ни дава иднина. Силно верувам дека Франција може да биде мотор на проширувањето на ЕУ со Западниот Балкан. За нас е многу важно што Франција го поддржува процесот на интеграција на Северна Македонија во ЕУ, со јасно поставени стандарди и без да се губи време“, вели Заев.
Македонскиот премиер на работната вечера во Париз е придружуван од вицепремиерот за европски прашања, Никола Димитров и министерот за надворешни работи, Бујар Османи.
И германско-францускиот самит донесе уште една потврда за европската перспектива на земјите од Западниот Балкан. Германската канцеларка Ангела Меркел и францускиот претседател Емануел Макрон заедно со своите влади денеска го оддржаа 22 самит, воедно и последен за Меркел. Целодневните дискусии се фокусираа на бројни теми: од пандемијата на коронавирусот, преку иднината на Европа, до меѓународни кризи како Белорусија и Израел.
Од состанокот произлезе заеднички документ од 62 точки во кој иднината на земјите од Западниот Балкан е последната. Во него, двете земји ја реафирмираат стратешката важност на регионот и даваат поддршка на дијалогот меѓу Србија и Косово.
„Ја реафирмираме стратешката важност на земјите од Западниот Балкан и остануваме цврсто посветени на нивната европска перспектива, истовремено повикувајќи на продолжување на суштинските реформи во согласност со новата методологија“, се наведува во заедничката изјава по самитот.
„Како што е формулирано на заедничките средби на високо ниво во 2019 и 2020 година, ја потврдуваме целосната поддршка за дијалогот меѓу Косово и Србија со посредство на ЕУ.“
Првиот франко-германски министерски совет се одржа во Париз на 22 јануари, 2003. Тоа беше замена за годишните самити на германските и француските шефови на држави и влади согласно Елисејскиот договор од 1963 година. Советот, чија цел е продлабочување на работните врски меѓу соседните држави преку одржување на заеднички владини седници, се состанува двапати годишно, напролет и наесен.
Денешниот состанок беше последен на кој присуствува Меркел, која најави дека ќе се повлече од политиката во септември. Прашана да ги сумира резултатите од самитите одржани во нејзиниот мандат и да даде оценка за постигнатото, Меркел со насмевка се воздржа од директен одговор: „Ќе даваме оценки кога работата ќе заврши“, рече таа.
