Јужнокорејските мдиуми „трубат“ дека нивни непријатели се САД, Јужна Кореја и Јапонија а дека Украина е дел од овие земји, па така борбата против последната е борба и против претходните три држави!
ЏУЛИЈАН РЕЈЛ
Севернокорејската пропаганда се труди најдобро што може да разбуди чувства на гордост, одмазда и отпор за да ја прикрие непријатната реалност дека Севернокорејците умираат за интересите на Москва, а не за своите.
Жртвите се огромни – се вели дека речиси 2.000 од 13.000 севернокорејски војници испратени во Украина се убиени, според податоците на јужнокорејската разузнавачка служба објавени во септември.
„ХЕРОЈСКА ЖРТВА“ И „МАЧЕНИШТВО“ За да ги прикаже овие загуби во позитивно светло за јавноста, режимот во Пјонгјанг се потпира на пропаганда. Во изолираната земја, ова функционира особено добро, бидејќи луѓето немаат пристап до алтернативни извори на информации освен медиумите контролирани од владата.
Државните медиуми ги повикуваат младите луѓе да се приклучат на војската за да станат „одреди самоубијци со куршуми и бомби“. Државната телевизија, исто така, емитуваше документарец за војниците испратени во Украина. Тој ја раскажува приказната за двајца млади војници кои детонирале граната за да извршат самоубиство пред да бидат заробени од украинските војници. Ова е претставено како херојски чин на саможртва.
Во исто време, објавени се и снимки од Ким Јонг-ун како се поклонува пред фотографии од паднати војници и ги прегрнува нивните семејства. „Ова е типично за Северна Кореја“, рече Мин Сунг-че, професор по комуникации и медиуми на Универзитетот Пејс во Њујорк. Идеолошката индоктринација има за цел да всади патриотизам кај идните генерации и потенцијалните војници. „Тие прикажуваат војници како извршуваат самоубиство затоа што тоа совршено се вклопува во долгогодишниот наратив на режимот за крајна жртва“, изјави Мин за ДВ. Херојските дела на паднатите војници се претставени како „мачеништво“.
РЕЖИМОТ СЕ ПЛАШИ ОД КОЛАПС Ервин Тан, професор по меѓународна политика на Универзитетот за надворешни студии Ханкук во Сеул, има поинаква теорија. Тој верува дека паднатите севернокорејски војници биле принудени да извршат самоубиство откако се обиделе да дезертираат или по лошите резултати на фронтот. „Овие видеа можеби имале за цел да им покажат на другите членови на севернокорејската војска дека „стравот и некомпетентноста не се толерираат“.
Севернокорејскиот режим користи пропаганда и строга служба за внатрешна безбедност за да бара лојалност од своите граѓани. Политичкото раководство живее во постојан страв, плашејќи се од колапс сличен на оној на СССР и источноевропските земји во 1990-тите. Судбината на романскиот диктатор Николае Чаушеску е особено загрижувачка. Тој владееше со Романија од 1965 до 1989 година, кога тој и неговата сопруга Елена беа погубени по бунтот во Букурешт. „Севернокорејскиот режим е целосно свесен дека власта е кревка“, вели Тан.
НЕПРИЈАТЕЛСТВО КОН РЕЧУИСИ СИТЕ ЗЕМЈИ Севернокорејскиот режим, исто така, вклучува непријателство кон САД, Јапонија и Јужна Кореја во својата пропаганда. Војната против Украина е претставена како „уште еден фронт во оваа борба“, вели Мин. „На овој начин, таа се трансформира од борба за Русија во директна одбрана на татковината“.
„Тврдењето на севернокорејските државни медиуми дека нејзините војници се борат против Американци, Јужнокорејци и Јапонци служи за да се прикаже далечната и збунувачка војна како непосредна и идеолошки кохерентна“, вели Мин. Ова ги разгорува познатите чувства на гордост, одмазда и отпор, а во исто време помага да се маскира непријатната реалност дека Севернокорејците умираат за интересите на Москва, а не за своите.
