Нема сомнение дека изборот е резултат на теоријата за континуитетот на Антикорупциска ама истиот е ркасјно проблематичен во поголем дел од мандатот на овој ем слуѓжбеник ем и екстерен претставник на ова контролно тело!
Адем Чучуљ е човекот „од куќата“ кој деновиве исплива на врвот на трката за нов претседател на Државната комисија за спречување на корупцијата. Со освоени 96,50 бодови на ранг-листата на собраниската Комисија за селекција, актуелниот генерален секретар на ДКСК стана прв фаворит за позицијата прв антикорупционер, иако конечната одлука сè уште ја носат Комисијата за избори и именувања и Собранието.
Чучуљ е дипломиран правник од Скопје и повеќе од деветнаесет години работи во службите на Антикорупциската комисија. На старите списоци на вработени се појавува како „советник за спречување на корупција во политиката“, а во поновите документи и на официјалната веб-страница на ДКСК е наведен како генерален секретар и прво контакт-лице за медиумите.
Тоа значи дека неговата кариера течела од експерт за политичка корупција, до човек што го води секретаријатот и административната машина на Комисијата.
Во своето интервју пред Комисијата за селекција, Чучуљ изјавил дека Антикорупциската ја чувствува како „свој дом“ и дека одржува контакти со речиси сите членови на петте досегашни мандати на Комисијата.
Дел од тој континуитет е и фактот што тој беше генерален секретар и во мандатот на Татјана Димитровска – поранешната претседателка која поднесе оставка по обвинението во случајот „Адитив“, каде меѓу друго се товари за оддавање службена тајна и местење безбедносен тест.
На интервјуто, Чучуљ не бил директно прашан за неговата соработка со Димитровска; само оценил дека Комисијата „работела, но не го претставувала доволно сработеното“.
Оценките на Комисијата за селекција во најголем дел се позитивни: забележуваат „значајно искуство во спречување на корупцијата и судирот на интереси“ и „јасна визија и конкретен план за работата и развојот на ДКСК“.
На сите општи и посебни прашања, според образложението, Чучуљ дал одлични одговори, што му ја донело највисоката оценка во конкуренција од десетмина кандидати – пред ревизорот Бранко Смилевски и професорот Кимо Чавдар.
Во програмските настапи и во јавните документи каде се појавува како контакт-лице од ДКСК, Чучуљ е поврзан со темите превенција, имотни листови и регистри на функционери. Во текстот на Телма од интервјуто во Собранието, се наведува дека тој се залагал за повеќе превентивни антикорупциски мерки, за дополнување на регистрите со податоци за имотната состојба на функционерите и за набавка и одржување на специјализиран софтвер што државата сè уште не го финансира систематски.
Слично, во документите на Отворено владино партнерство (OGP) неговото име стои зад обврските за систематско доставување и контролирање на изјавите за имотната состојба.
Кариерата на Чучуљ во ДКСК не се ограничува само на кабинетска работа. На повеќе фотографии и објави на официјалниот Facebook-профил на Комисијата, тој се појавува како предавач на обуки за корупција и судир на интереси за јавни функционери, како делегациски член на средби со странски амбасадори и партнери од Шведска и Швајцарија, но и како домаќин на работни состаноци со меѓународни организации.
Тоа го позиционира како човек кој не само што ја знае внатрешната администрација, туку е лице на ДКСК и кон институциите и кон донаторите.
Од друга страна, токму тој „инсајдерски“ статус отвора и прашања: дали човек кој речиси две децении е дел од истата институција може да биде симбол на радикален пресврт во момент кога Европската комисија нотира дека ДКСК не е активна како порано и дека треба проактивно да открива случаи на корупција кај носителите на власт? Чучуљ во интервјуто порача дека европските критики треба да се прифатат и да се работи на нивно надминување, но јавноста дури сега ја слуша неговата визија во прво лице.
Процедурата формално сè уште трае: по рангирањето, Комисијата за избори и именувања треба да одбере едно име и да го предложи до пратениците, кои на седница ќе гласаат за новиот претседател на ДКСК.
Но исходот веќе е навестен – доколку не дојде до политички пресврт, Адем Чучуљ, многугодишниот генералeн секретар, ќе се пресели од вториот ред на сцената во првиот ред, како ново лице на институцијата задолжена да ја чува државата од корупцијата и судирот на интереси. Каков ќе биде тој пресврт – континуитет со познатите практики или обид за нов почеток од внатре – ќе стане јасно кога Собранието ќе го потврди или одбие човекот кој Антикорупциската ја нарекува свој дом.
(racin.mk – опемата е на Глобус)
