Екипата на филмот „Синиот час“ реагираше за наградата на Лечиќ: Исклучително штетна и опасна порака за жените во македонските филмски и изведувачки уметности – беше нивниот став
Екипата на краткиот филм „Синиот час“ кој беше дел од официјалната програма на Киненова. реагира на одлуката на организаторите да го наградат српскиот актер Бранислав Лечиќ за особен придонес во филмската уметност.
„Храброста на актерките Данијела Штајнфелд и Мерима Исаковиќ да проговорат јавно за настаните од минатото е непроценливо важна за градењето на заедница кадешто жените ќе се чувствуваат безбедно, слушнато и еднакво важно. Одлуката на Киненова да го награди Лечиќ е повеќе од контроверзна. Во Србија, земјата од кадешто доаѓа Лечиќ, неколку актерки јавно проговорија за насилството извршено од нивните машки колеги и започнаа локално #MeToo движење, справувајќи се со целиот јавен линч. Во Македонија, тоа не се ни случи. Со оваа награда доделена во Скопје, Киненова придонесува кон замолчувањето на жртвите со тоа што на свечена манифестација им рече „ние не ви веруваме“. Ова е исклучително штетна и опасна порака за жените во македонските филмски и изведувачки уметности, а и воопшто. Екипата на краткиот филм „Синиот час“, кој беше дел од официјалната програма на ова издание на фестивалот, ја осудува. Во оваа прилика, сакаме јавно да порачаме дека ние цврсто стоиме на страната на жртвите. Не во наше име! Потпишани: Наташа Петровиќ – актерка, Тамара Ристоска – актерка, Жаклина Стевковска – актерка, Горјан Атанасов – монтажер, Дејан Димески – кинематографер, Ана Јакимска – режисерка и сценаристка“, се наведува во реакцијата на филмските работници, објавена на Фејсбук од режисерката Јакимска.
Како што претходно пиша Градска.мк, за организаторите на Киненова, не е спорно, тоа што за Лечиќ се водеа судски процеси за силување на своја колешка во Србија.
-Ние доделуваме награда за особен придонес во филмската уметност, а не му судиме на актерот Лечиќ. Дополнително процесот на неговото доаѓање беше договорен уште од 2018 година, еднаш го одложивме но сега повторно го поканивме бидејќи е навистина квалитетен автор, изјави за Градска.мк, директорот на Фестивалот, Небојша Јовановиќ.
На дополнително прашање дали Јовановиќ помислува какво чувство оваа награда за актерот Лечиќ ќе предизвика кај жените, тој додаде дека на програмата има многу филмови кои ќе допринесат во борабата со насилството врз жените и секако нивна заштита.
(gradska.mk)
