Северна Македонија е на 95-то место според индексот за слобода на медиумите. Во 2016 беше на 111 место, .следната година на 109
Северна Македонија е на 95-то место според последниот светски индекс за слободата на медиумите на Репортери без граници (РСФ), што е скок од 14 места.
Главна забелешка на Репортери без граници оваа година е состојбата во јавниот сервис, МРТВ, каде владата сѐ уште не спровела реформи.
– Иако ситуацијата се стабилизираше во 2018, новата влада сѐ уште не го изменила Законот за јавниот радиодифузер, спротивно на она што го најавуваше во 2017, нагласува организацијата. – Така што, за сега, програмата на јавниот сервис продолжува да ги служи интересите на поранешната владејачка конзервативна партија, ВМРО-ДПМНЕ, стои во извештајот на Репортери без граници за оваа година.
Иако не се регистрирани напади врз новинарите во текот на минатата година во Македонија и безбедноста на новинарите бележи значителен напредок, Репортери без граници предупредуваат дека културата на неказнивост продолжува да владее во земјата. Само два од 59 регистрирани напади врз новинари во последните години биле предмет на истрага и добиле завршница.
– Ова не го постигнува потребниот степен за да се обесхрабрат одговорните за нападите, предупредува РСФ.
Во делот на законските регулативи, организацијата за заштита на новинарите забележува дека се потребни измени во делот за клевета и пристапот до државни информации. РСФ нагласува и дека контроверзен амандман, со кој и се дозволува на Државната изборна комисија да го набљудува известувањето на изборите во електронските медиуми, е усвоено без дебата и без консултации.
Конечно, Репортери без граници бараат да се посвети внимание на фактот што „високи владини функционери имаат вкоренета тенденција да им се закануваат и да ги навредуваат новинарите“.
Треба да се укажње дека ова е најдобриот скор за слободата на медиумите во Македонија во последните пет години.
Македонија во 2017 (индекс за 2016та) беше на 111 место на ранкингот на Репортери без граници.
Во 2018-та (индекс за 2017) напреднавме за две места и бевме на 109-то место.
Во 2019-та (индекс за 2018-та) сме на 95-то место, односно имаме напредок од 14 места.
За жал, комeнтираат самите новинари, многу медиуми во Македонија објавија дека на годинешниот индекс на Репортери без граници не сме напреднале воопшто. Зошто?
