Ова е најголем пожар досега што го има зафатено ова претставува национално и светско природно богатство со кое треба да се гордее целата држава
Во пожарот на 20 и 21 јули изгоре половина од Паркот на природата „Езерани“ во Преспа, а направена е штета од милиони евра, објави Македонското еколошко друштво (МЕД). Ова е најголем пожар досега што го има зафатено ова претставува национално и светско природно богатство со кое треба да се гордее целата држава. Тие споделија драматично видео од состојбата по гаснењето на пожарот и се обврзаа да продолжат да работат на подигање на јавната свест за значењето на природата.
Изминатите денови тимот на МЕД, предводен од Лазар Николов изврши детална анализа на состојбите на терен. Пожарот проголтал површина од повеќе од 500 хектари, главно природа која треба да биде гордост во претставување на нашите природни вредности пред светот.
Изгореле околу 200 хектари трска, над 160 хектари шуми и галерии од врби и тополи, околу 100 хектари на ливадски заедници, околу 30 хектари шуми од евла, околу 15 хектари земјоделски насади и овоштарници и 10 хектари преодни вегетациски типови од најблиското крајбрежје на езерото.
Околу 50 отсто од зафатените површини од шуми и овоштарници се целосно уништени. Скоро половина од копнената површина на Паркот на природата „Езерани“ настрада во овој пожар, предизвикувајќи штети во вредност од милиони евра. „Езерани“ е прогласено за заштитено подрачје од четврта категорија според Законот за заштита на природа, во согласност со критериумите на Меѓународниот сојуз за заштита на природа (IUCN). Жалиме за целата настаната штета која ја претрпе Преспа и се обврзуваме дека и во иднина ќе продолжиме да работиме на подигање на јавната свест за значењето на природата – вели Николов.
Паркот на природата „Езерани“ е заштитено подрачје сместено на северното езерско крајбрежје и важи за едно од најзначајните подрачја за биолошка разновидност во Преспанскиот Регион и во државата, дом на многу растителни и животински видови кои станаа жртви на огнот.
– Освен негативните последици врз биодиверзитетот, пожарот несомнено ќе се одрази негативно и врз целиот Преспански предел, дополнително ќе биде нарушена состојбата на езерото и квалитетот на живот на локалното население – апелираа од МЕД.
