Исходот од вториот круг од претседателските избори во Романија беше изненадувачки мирен. И на задоволство на проевропскиот табор. Либералниот политичар Никушор Дан освои речиси 54 проценти од гласовите – околу 850.000 гласови повеќе од неговиот противник, радикалниот десничар Ѓорѓе Симион
Со убедлива победа во вториот круг од претседателските избори, Никушор Дан, градоначалник на Букурешт и проевропски либерал, стана нов претседател на Романија. Неговиот триумф над радикалниот десничар Симион покажува дека граѓаните сè уште веруваат во реформите и европскиот пат.
Никушор Дан заврши со убедлива победа во вториот круг од претседателските избори во Романија. Кој е овој градоначалник на Букурешт и убеден Европеец?
Исходот од вториот круг од претседателските избори во Романија беше изненадувачки мирен. И на задоволство на проевропскиот табор.
Либералниот политичар Никушор Дан освои речиси 54 проценти од гласовите – околу 850.000 гласови повеќе од неговиот противник, радикалниот десничар Ѓорѓе Симион.
Клучот за успехот на овој професор по математика беше високата излезност – гласаа речиси две третини од Романците, во споредба со едвај повеќе од половина во првиот круг.
Очигледно, многумина апстиненти решија да излезат на гласање откако видоа дека Симион победи убедливо во првиот круг. Тие дополнителни гласачи го спречија доаѓањето на десничарски радикал на чело на Романија.
ПРАГМАТИЧНИОТ ПРОФЕСОР Идниот романски претседател, Дан, има 55 години и лесно може да се нарече математички гениј: како млад човек, тој двапати го освои златниот медал за Романија на Меѓународната математичка олимпијада. Членовите на неговиот изборен тим велат дека се однесува онака како што луѓето замислуваат дека се однесува типичен математичар – прагматичен е.
Така, на незадоволство на неговиот тим, тој одби бројни појавувања на социјалните мрежи бидејќи, според „неговата логика и пресметка“, тие не беа од директна корист. На крајот, тој успеа да победи и се обрати на јавноста преку камерите на класичната телевизија.
„Сакам да им се заблагодарам на десетиците илјади Романци, кои се бореа за нашата идеја во последните недели. Вие ја покажавте силата на граѓанското општество. Таа сила е многу посилна од отуѓеноста што владее во оваа земја“, рече Дан.
ВТОРИОТ КРУГ ПОМЕЃУ НЕТИПИЧНИ КАНДИДАТИ Во Романија, многу гласачи ја изгубија довербата во политиката и затоа се отуѓени од неа.
И десничарскиот радикал Симион и независниот политичар Дан беа кандидати за протест.
Крин Антонеску, кандидатот на големата владина коалиција, се откажа од изборите уште во првиот круг.
Владината коалиција се распадна на почетокот на мај. Премиерот Марсел Чолаку поднесе оставка. Владата стануваше сè понепопуларна и беше обвинета за корупција. Романија е третата најкорумпирана земја во ЕУ, по Унгарија и Бугарија.
Дан, како нов претседател на Романија, сака да го промени тоа, а многумина му веруваат. За разлика од другите романски политичари, тој самиот не беше поврзан со корупција. Во својот говор по победата, Дан рече: „Денешните избори ги доби заедница на Романци кои сакаат длабоки промени. Заедница која сака ефикасна администрација, земја со помалку корупција и просперитетна економија за граѓаните на Романија.“
Кој ќе ја формира новата влада?
Една од првите задачи на претседателот Дан ќе биде да даде мандат за формирање влада. Во моментов, тешко е да се замисли со кои сили Дан би можел добро да соработува, бидејќи реформистите немаат мнозинство во романскиот парламент.
Дан, исто така, сака да им се обрати на гласачите на десничарскиот кандидат Симион, за кого гласаа околу пет милиони гласачи.
„Тоа е група толку огорчена што верува дека решението за Романија е револуција. Наша должност е да ги убедиме дека решението е судска реформа и административна реформа. Доаѓаат тешки времиња, во кои ќе мора да ја стабилизираме економијата. Ве молам за надеж и трпение“, рече Дан.
СИМЕОН БИ БИЛ СРАМЕН ЗА ЕУ Поразениот кандидат на претседателските избори – 38-годишниот шеф на партијата AUR, Ѓорѓе Симион – се обрати на јавноста преку донекаде необично видео.
Во елегантен син костум, седејќи на луксузна дрвена маса, со меланхолична музика на пијано, тој го објави својот пораз. „Време е да ја продолжиме нашата борба за правда и вистина, за традиционалното семејство, за христијанската вера и слобода“, рече Симион.
Како претседател, тој веројатно би бил многу непријатен за ЕУ. Тој сакаше да се спротивстави на Европската комисија и се залагаше за зајакнување на националната држава. Тој се спротивстави на воената помош за Украина и имаше соништа за Голема Романија – вклучително и обединување со Молдавија.
