Фестивалот го отвори големата Ванеса Меј (родена во Сингапур и настапува по целиот свет), виолинистка со светско реноме. Таа во преполниот Антички театар во Охрид настапи со оркестарот на Македонската филхрмонија, под диригентската палка на Иван Кожухаров (роден во Бургас, Бугарија), исто така со светско реноме.
ЛИЛЈАНА МАЗОВА
Најголемата летна манифестација Охридското лето кое годинава го има своето 59. издание, во традиционалниот термин од 12 јули до 20 август, и во двете програми – музичката и драмската, најави уште еден фестивал со добра програма.
Фестивалот го отвори големата Ванеса Меј (родена во Сингапур и настапува по целиот свет), виолинистка со светско реноме. Таа во преполниот Антички театар во Охрид настапи со оркестарот на Македонската филхрмонија, под диригентската палка на Иван Кожухаров (роден во Бургас, Бугарија), исто така со светско реноме. Публиката уживаше и во нивната виртуозност и во изборот на програмата. Големите уметници и нашиот оркестар на Македонската филхармонија покажаа врвна моќ, воедначеност и сигурност во секој миг од концертот.
На втората фестивалска вечер (13 јули) се одржа театарската претстава „Самрак на боговите“ во продукција на Драмата на Словенското народно гледалишче од Марибор, Словенија. Работена според сценариото на Лукино Вискомти, Енрико Медиоли и Никол Бадалука, а во режија на Далибор Матаниќ.
Во фестивалската програма пишува дека „една од главните теми на филмот ’Падот на боговите’ на Висконти е тесната врска помеѓу капитализмот и фашизмот, кој е длабоко вкоренет во германското тајкунско семејство Фон Есенбек. По смртта на семејниот патрон, во прашање е неговото наследство и неговото преземање од различни страни, иако наследниците сеуште не сфатиле дека се земени како заложници од помоќна политичка машинерија со нивната алчност…“.
Претставата покажува и како „серијата на семејни расправии го расцепкува семејството на моќната династија, обелоденувајќи ја здодевната патолошка состојба и перверзност, како и бескомпромисните егоистички интереси на членовите…“. Функционира како голема фреска која е секогаш актуелна.
Во преден план се меѓучовечките односи – спротивноста на политиката и интимните манипулации, нивното влијание на поединецот и сите што се вовлечени во таа состојба. Актерите и сите други учесници во реализацијата на „Самрак на боговите“ точно го конструирале дејствието и создале претстава која тера на размислување и на состојба на јаловост која се создава во такви ситуации. Секој точно го знае/интерпретира својот лик и неговото место во целината.
„Самрак на боговите“ е претстава која те „заробува“ и на крајот сакаш уште. Трае и со искреноста и со целта од која тргнала и стигнала до чисто/високо ниво на изведба. Покажува и како се манипулира со луѓето, но и нивниот погрешен избор, лакомост, безочност…
Реков дека двата први настани на годинашното 59. Охридско лето се, да веруваме, показ/репер за добар фестивал. И во сите следни вечери до 20 август (кога завршува) да го очекуваме добриот избор на одбраната програа и во музичкиот и во театарскиот дел. Изборот на програмата, односно програмски селектори, годинава се проф.м-р Васо Ристов, музички селектор и режисерот Александар Поповски, драмски селектор.
Господинот Стево Пендаровски, претседател на Република Северна Македонија, кој и го отвори годинашното издание на Охридското лето, меѓу другото (во каталогот) вели дека „… Охрид покрај природните убавини, културно-историското наследство и духовните традиции има скоро 6 децении долга историја на призната и позната културно-уметничка манифестација, која е своевиден репрезент на случувањата и актуелностите на домашната музичка и театарска сцена, но и сцена на која може да се видат врвни имиња во европски и светски размери…“.
Директорката на Охридско лето Наташа Поповиќ, исто во фестивалската програмка, меѓу другото, истакнува: „… Годинашното мото на фестивалот што го конципиравме заеднички со тимот е Звукот и бојата на езерото. Се надевам дека звуците што ќе одекнат во преубавата и акустична ’Света Софија’ и уметноста што ќе зрачи и оплеменува на Античкиот театар, на сцената ’Долни Сарај’ и во Центарот за култура „Григор Прличев“ ќе се паметат многу долго по завршувањето на фестивалското издание…“.
Фестивалскиот почеток тоа го најави и останува да веруваме дека така ќе биде и до крајот на 59. Охридско лето.
