Езерата во Европа и Азија се до езерото Титикака во Јужна Америка, губат вода со кумулативна стапка од околу 22 гигатони годишно, се вели во една студија од поново време
Повеќе од половина од големите езера и резервоари во светот се намалени од раните 1990-ти, главно поради климатските промени, интензивирајќи ја загриженоста за водата за земјоделство, хидроенергијата и човечката потрошувачка, покажа нова студија.
Меѓународен тим на истражувачи објави дека некои од најважните извори на вода во светот – од Каспиското Море меѓу Европа и Азија до езерото Титикака во Јужна Америка, губат вода со кумулативна стапка од околу 22 гигатони годишно речиси три децении. Тоа е околу 17 пати поголемо од обемот на езерото Мид, најголемиот резервоар во САД.
Фангфанг Јао, површински хидролог од Универзитетот на Вирџинија, кој ја водеше студијата во списанието „Наука“, рече дека 56 отсто од падот на природните езера е предизвикан од затоплувањето на климата и човечката потрошувачка, со затоплувањето како „најголем дел од тоа“.
Научниците генерално мислат дека сушните области во светот ќе станат посуви поради климатските промени, а влажните области ќе станат повлажни, но студијата откри значителна загуба на вода дури и во влажните региони.
„Ова не треба да се занемари“, рече Јао.
Научниците процениле речиси 2.000 големи езера користејќи сателитски мерења во комбинација со климатски и хидролошки модели.
Тие открија дека неодржливата човечка употреба, промените во врнежите и истекувањето, седиментацијата и зголемените температури го намалиле нивото на езерата на глобално ниво, при што 53 отсто од езерата покажаа пад од 1992 до 2020 година. Речиси две милијарди луѓе кои живеат во езерски басени кои се сушат се директно погодени, а многу региони се соочија со недостиг на вода во последниве години.
Научниците и активистите долго време велат дека е неопходно да се спречи глобалното затоплување над 1,5 Целзиусови степени (2,7 Ф) за да се избегнат најкатастрофалните последици од климатските промени. Светот веќе се загреа околу 1,1 Целзиусови степени (1,9 Ф).
Студијата покажа дека неодржливата човечка употреба ги суши езерата како што се Аралското Море во Централна Азија и Мртвото Море на Блискиот Исток, додека езерата во Авганистан, Египет и во Монголија биле погодени од зголемените температури, што може да ја зголеми загубата на вода во атмосферата.
Нивото на водата се зголеми во четвртина од езерата, често како резултат на изградбата на брани во оддалечените области како Тибетската Висорамнина.
Да се потсетиме дека годинешниот самит во Давос беше посветен на климатските промени! Американскиот претставник за климатски промени Џон Кери рече дека и покрај речиси еден трилион долари посветени од глобалните филантропии за различни причини во последните неколку години, само 2 отсто од оваа сума оди за климатски активности. Тој за време на панел дискусијата на Светскиот економски форум во Давос рече дека се проценува дека од 7,5 до 12,5 милијарди долари глобална филантропија е насочена кон климатските активности. Тој и другите ги повикаа филантропиите ширум светот да се здружат и да придонесат повеќе за климатските активности.
На форумот имаше и повикот за акција „ГАЕА“, нов глобален напор на Светскиот економски форум за подигање дополнителна филантропија која може да ги финансира акциите наменети за климатските промени.
Европската унија ќе продолжи со големиот индустриски план за чиста технологија, кој не само што треба да го одржи континентот, туку и да го гарантира неговиот економски опстанок додека се соочува со предизвиците од Кина и Соединетите држави.
Претседателката на Европската комисија Урсула фон дер Лајен во Давос ги претстави контурите за нејзиниот „Индустриски план за зелена зделка“. Планот ќе го олесни спроведувањето на субвенциите за зелените индустрии и здружувањето на проекти ширум ЕУ кои се зајакнати со големи финансиски средства. ЕУ ја следи целта да биде климатски неутрална до 2050 година.
На петдневниот состанок, кој се одржува под знамето „Соработка во фрагментиран свет“, ќе учествуваат над 50 шефови на држави и влади, меѓу кои и германскиот канцелар Олаф Шолц, претседателката на Европската комисија Урсула фон дер Лајен и шпанскиот премиер Педро Санчез.
