Во многубројните ракети кои паѓаат врз Украина денес има и такви кои претходно биле украински или имале елементи направени на нејзино тло – со свој камен по глава!
ПИВО АНДРЕА(АРД)
Ако Украина имаше нуклеарно оружје, денес немаше да има војна, вели пензиониран ракетен инженер од Украина. Пред 30 години Украина и го предаде целото нуклеарно оружје на Русија – по склучувањето на Будимпештанскиот меморандум.
За време на СССР, денешна Украина имаше смртоносен арсенал на оружје, вклучувајќи интерконтинентални балистички ракети и неколку илјади нуклеарни боеви глави за стратешки и тактички ракети. Едно од овие нуклеарни локации беше во Первомајск, лоциран на околу 300 километри јужно од Киев. „Се мислеше дека ова овде ќе трае вечно, но сега ова место е исплнето со смртна тишина“, рече пензионираниот ракетен инженер Валери Кузњецов, кој работеше овде со децении, според извештајот на германскиот јавен радиодифузен сервис АРД.
БЕВ ПОДГОТВЕН ДА ГО ПРИТИСНАМ КОПЧЕТО Огромниот терен на поранешната нуклеарна ракетна база на 46-та ракетна дивизија е претворен во музеј повеќе од 20 години. Во командниот центар длабоко под земја, црвено светло е вклучено и Кузњецов симулира лансирање ракета. Тој објаснува дека кога бил на борбена должност, секогаш бил подготвен да го притисне копчето за лансирање на проектилот – доколку имало соодветна наредба од Москва.
„Ни рекоа дека кога ќе добиеме наредба за лансирање, против нас веќе летаат ракетите. Времето на летот од Америка е, на пример, од 22 до 28 минути, а од Европа – до 12 минути. А денес дури и помалку, бидејќи веќе има хиперсонични проектили“, изјави поранешниот војник за АРД.
ВО 1982 ГОДИНА: РЕШИВМЕ ДЕКА ЌЕ ИМА ВОЈНА Кузњецов не можеше однапред да ја знае целта на советскиот нуклеарен удар, иако во тоа време имаше лидерска позиција. Притискањето на копчето беше едноставно последниот момент во долгиот синџир на команди.
Денешниот пензионер се сеќава на една кризна ситуација во 1982 година: во тоа време, неколку минути не беше јасно дали ќе се изврши нуклеарен удар или не. Сите телефони беа зафатени и не беа достапни ниту командните центри на стратешките ракетни сили, ниту луѓето од стратешката авијација или подморниците. „Сите мислевме дека започнува војна“, се сеќава Кузњецов.
„Повторно ни треба членство во НАТО или нуклеарно оружје“
Кузњецов ја загуби работата на 5 декември 1994 година. На тој ден, тогашниот украински претседател Леонид Кучма го потпиша Договорот од Будимпешта, во кој Киев се обврза да и го предаде на Русија целото свое нуклеарно оружје и голем дел од своето конвенционално оружје. За возврат, САД, Велика Британија и Русија мора да ја гарантираат безбедноста на Украина.
Сепак, меморандумот не вреди за хартијата на која е напишан, вели Кузњецов, повторувајќи го мислењето на многу Украинци денес. Со часови може да зборува за нуклеарни или интерконтинентални балистички ракети, на пример, „Сатана“ со дострел од 15.000 километри. Да се откаже од сето ова било политички наивно, убеден е поранешниот воен. „Затоа мораме да влеземе во НАТО или да го вратиме она што го оставивме зад себе – нуклеарното оружје во Украина. Тој е убеден дека ако Украина имаше барем тактичко нуклеарно оружје, „денес немаше да има војна“.
Од почетокот на инвазијата, Русија истрела околу 14.000 беспилотни летала и повеќе од 9.000 проектили кон соседната земја. Меѓу нив има и такви кои се изградени со помош на украинска експертиза, посочи Кузњецов за АРД.
ЗЛОСТОРСТВО ПРОТИВ УКРАИНСКИОТ НАРОД На маргините на состанокот на министрите за надворешни работи на НАТО во Брисел оваа недела, украинскиот министер за надворешни работи Андриј Сибиха на новинарите им покажа папка со документот од Меморандумот од Будимпешта. Според него, меморандумот не гарантирал ниту украинска, ниту трансатлантска безбедност и бил грешка, а во таа насока повикал на поголема солидарност од страна на партнерите. Мир за Украина е замислив само ако има гаранција дека Русија повеќе нема да може да ја напаѓа, односно ако земјата биде примена во НАТО.
Во овој контекст се разговара за неколку модели, но Украина инсистира на формална покана во меѓународно признатите граници од 1991 година, т.е. вклучувајќи ги и териториите окупирани од Русија.
„Западот некогаш ми беше непријател, а денес сакам Украина да стане членка на НАТО“, вели 70-годишниот Кузњецов. Пред АРД, тој го обвини тогашното украинско раководство дека со потпишувањето на предметниот меморандум извршило злосторство против украинскиот народ и украинската држава.
