Воениот аналитичар Маркус Рајснер за АРД изјави дека намерата на Украина била да ги принуди Русите да ги повлечат своите единици од областите на Донбас, каде што се водат тешки борби и да ги префрлат во Курск. „Русија се обидува да го избегне ова бидејќи моментално напредува во Донбас. Затоа, таа сега сака да подигне нови сили од внатрешноста на земјата и да ги насочи кон Курск. Затоа е потребно време за да почнат овие активности“.
„Во последните 900+ дена од војната, видовме дека Русија постојано прави фатални грешки. Но, благодарение на нејзините ресурси, таа отсекогаш можела да ги коригира досега. Таков е и овој случај. Русија беше концентрирана 100 отсто на Донбас и не претпоставуваше дека Украина сè уште е способна да изврши офанзива во Курск. Затоа овој дел од фронтот остана без големо внимание“, истакна воениот аналитичар полковник Маркус Рајснер за АРД.
Воениот аналитичар Маркус Рајснер за АРД изјави дека намерата на Украина била да ги принуди Русите да ги повлечат своите единици од областите на Донбас, каде што се водат тешки борби и да ги префрлат во Курск. „Русија се обидува да го избегне ова бидејќи моментално напредува во Донбас. Затоа, таа сега сака да подигне нови сили од внатрешноста на земјата и да ги насочи кон Курск. Затоа е потребно време за да почнат овие активности“.
ШАНСИТЕ И РИЗИЦИТЕ Маркус Рајснер даде предвидување за АРД за тоа колку долго Украина ќе може да ја задржи контролата врз освоените територии. „Украина се обидува да го прошири своето присуство во регионот, но постојано наидува на отпор. Се обидува да ги задржи освоените територии, како и да заземе нови. Дилемата е дека Украина е веќе на три фронта. Таа мора да обезбеди војници, ресурси, оружје и опрема и за Донбас и за областа околу Харков, а сега и за Курск. Во оваа игра на ресурси во рамките на војната која многу исцрпува, прашањето е дали Украина ќе покаже доволно издржливост“.
Воениот експерт посочува дека поради огромната популација Русија има можност постојано да регрутира нови војници. „Се проценува дека до крајот на годината 690.000 руски војници ќе бидат фрлени во борбите против Украина. Но, не произлегува дека нема да има недостиг од воен персонал. Се претпоставува, на пример, дека Русија губи по 1.000 војници секој ден – убиени или ранети. Затоа, во битките се вклучени и неискусни регрути, кои буквално беа збришани од Украинците. Многу од нив се исто така заробени – според украинските податоци станува збор за околу 100 луѓе дневно“.
УКРАИНА МОРА ДА ОСТАНЕ ФЛЕКСИБИЛНА И МОБИЛНА Рајснер вели и дека Украина успева кога е флексибилна и мобилна. „Дилемата на Украина секогаш започнува кога овој ефект е отсутен и Русите успеваат да ја натераат во исцрпувачка позициска војна. Ова може да се случи сега во Курск“.
Експертот објасни за АРД дека кога офанзивата ќе заврши и Украина треба да брани некои лошо подготвени позиции, тупаницата на руската армија може повторно да падне врз неа. „Украина мора да остане пргава и флексибилна за да успее. Но, Русија всушност секогаш преовладува поради достапноста на огромни ресурси. Ова го гледаме веќе 900 дена. Без разлика на успесите на украинската армија, Русија постојано успева да си ги врати шансите“.
ЛЕКЦИИТЕ ОД СВЕТСКИТЕ ВОЈНИ Зарем тогаш не излезе дека офанзивата на Курск не беше пресвртница, туку запрепастувачка регуларност во текот на војната, прашува Сузан Петерсон од АРД. Како одговор, Рајснер прави споредба со Првата светска војна, каде рамковните услови биле различни, но може да се најдат и многу паралели. „На пример, неоснованата еуфорија од 1914 година дека војната ќе може брзо да заврши. По неуспехот на руската офанзива од 2022 година, имаше и слични надежи.
Маркус Рајснер прави споредба и со 1916 година – „година на несреќните офанзиви во кои загинаа стотици илјади луѓе, но ова е и година во која, како што знаеме, беа направени првите обиди за почеток на мировни преговори. После тоа, сепак, војната траеше уште две години. А денес знаеме нешто друго – Првата светска војна всушност била основа за многу пострашната Втора светска војна, која започнала 21 година подоцна, која го засенила сето она што се случувало за време на Првата. Ова дефинитивно треба да биде предупредување за нас“, потенцира воениот експерт за АРД.
Нема независни информации од самиот регион Курск – честопати доаѓаат од социјалните мрежи, од руските блогери и од властите. Воените блогери зборуваат, на пример, за немирна ноќ и обиди на украинските вооружени сили да го продолжат „блицкригот“. Се уште нема официјална потврда или други информации од Украина за воената операција, која трае две недели.
Руското Министерство за одбрана објави видео за кое тврди дека го покажува зголеменото воено присуство во областа. Се гледа дека тенкови заземаат борбени позиции. Снимката не може да се потврди независно. Министерството извести и за бројни одбиени украински напади со беспилотни летала во регионот Курск.
„Ситуацијата во моментов се стабилизира“, напиша рускиот блогер Александар Харченко на социјалната мрежа Телеграм. Руските единици напредуваат, тврди тој. „Градот Суја се спротивстави на нападите, командата вложува максимални напори да го исчисти градот од непријателот“, додаде Харченко веднаш можеме да кажеме дека врвот на кризата помина“.
РУСИЈА ВОВЕДЕ ПОСЕБНИ МЕРКИ ВО ТРИ ОБЛАСТИ Руското раководство ги прогласи регионите Курск, Брјанск и Белгород за зони во кои се спроведуваат „антитерористички операции“. Оваа одлука дава дополнителни овластувања на армијата и безбедносните сили. Видео кое кружи на социјалните мрежи покажува мажи во униформи кои носат украински знамиња во селото Порос во руската област Белгород, на само неколку километри од границата со Украина. Тоа не може да биде потврдено од независни извори. Некои медиуми видеото го опишаа како можна саботажа од страна на украинските вооружени сили. Веќе по нападите со беспилотни летала од украинска страна минатата година, жителите на неколку села во Белгородската област ги напуштија.
Американскиот Институт за проучување на војната (ISW) во петокот напиша дека украинските војници напреднале до 35 километри на руска територија во областа Курск. Сепак, тие не ја контролираат областа целосно. Од гледна точка на воената стратегија, напредувањето на територијата на Русија може да создаде тампон зона за населението во спорните региони на Украина. Очигледно има за цел да ја принуди Русија да распореди повеќе војници во спорната погранична област и да ги ослаби позициите на други фронтови.
Уништени воени возила и загинати војници – тоа може да се види од видеата дистрибуирани во „Телеграм“ во последните три дена, пишува и германски „Франкфуртер алгемајне цајтунг“. Според руските воени блогери, десетици Руси ги загубиле животите. На едно од видеата се гледа уништена цела колона руски возила. Анализата на јавно достапните податоци укажува дека видеото е снимено во селото Октјабарское, кое е на 120 километри од Курск, главниот град на регионот што го напаѓаат Украинците. Според некои руски воени блогери, конвојот бил гаѓан од американски ракети ХИМАРС. Сепак, ниту Украина ниту Русија се уште не ја потврдија оваа информација.
Но, виновниците веќе се бараат во руските канали на социјалните мрежи – и пред се во редовите на руското Министерство за одбрана. Еден од каналите го повика претседателот Владимир Путин да ги забрани воените конвои со повеќе од три возила во областите кои би можеле да станат жртви на напади со беспилотни летала или ракети ХИМАРС. Меѓутоа, во петокот каналот на руското Министерство за одбрана објави фотографии од нов конвој кој носи воена опрема на фронтот, што предизвика нови критики.
ДАЛИ ГЕРАСИМОВ ЈА ИГНОРИРАЛ ОПАСНОСТА? Во моментов, началникот на рускиот Генералштаб, Валериј Герасимов, навлекува најсериозен гнев, кој во средата му рече на Путин дека „напредокот на непријателот“ е запрен. Руските канали во Телеграм, како и Блумберг, објавија дека Герасимов и неговите луѓе ги игнорирале извештаите од сопствените разузнавачи за масовноста на украинските војници на границата со регионот Курск и не го информирале Путин. Самиот Герасимов изјави дека не треба да се сее непотребна паника и да не се верува на „дезинформации“. И руските воени сили на крајот беа фатени од стража од украинската инвазија. Фотографиите и видеата го документираат заробувањето на десетици руски граничари и војници. Според украински извори, има стотици затвореници.
Каналот WTschK-OGPU, близок до руските безбедносни сили, објави дека Герасимов бил навреме информиран за подготовката на нападот, но ја игнорирал опасноста и дури повлекол дел од руските сили во областа. Каналот „Рибар“, кој е близок до Министерството за одбрана, не го именува Герасимов, но напиша дека во „еуфоријата“ од успесите на другите фронтови од војната против Украина, информациите за концентрацијата на украинските војници биле „ превиди“, пишува и ФАЦ.
ПУТИН ЗБОРУВА КАКО ДА ИМА ПРИРОДНА КАТАСТРОФА За време на неговата средба со вршителот на должноста гувернер на Курската област, Путин неколку пати го употребиЛ зборот „ситуација“. Неговата реторика звучеше како да се случила некоја природна катастрофа, коментира Фридрих Шмит во ФАЦ. Државната телевизија, пак, прикажа снимки од војници кои се обидуваат да ја забават украинската офанзива со бомби од 500 килограми, како и радосни сцени од бегалските кампови во Москва, каде децата славеа роденден.
Путин им вети на погодените жители на Курската област, од кои илјадници избегани од воената зона, по 10.000 рубли, што е еднакво на околу 100 евра. Сепак, на интернет кружат видеа на кои луѓе кои се претставуваат како жители на градот Суја апелираат до Путин да им помогне да си ја вратат земјата бидејќи борбите продолжуваат, а властите не реагирале соодветно. Во исто време, медиумскиот регулатор Роскомнадзор се повеќе се обидува да го ограничи пристапот до видео платформата YouTube. Корисниците на апликации како Сигнал, исто така, се пожалија на падови и тешкотии со пристапот во последните денови.
