Според студијата на еколошката организација Гринпис, Русија продолжува да заработува многу од своите енергетски договори со компании од Германија и други земји од ЕУ. Само во првите осум месеци од оваа година, 12,8 милијарди кубни метри руски течен гас се извезени во ЕУ
НИК ШАДЕР
Четири земји од ЕУ потрошиле повеќе за увоз на руски течен гас во последните години отколку за Украина. Неодамнешна студија на Гринпис покажува дека Путин продолжува да заработува милијарди од ЕУ и покрај санкциите.
Руските бродови за течен гас редовно се закотвуваат во пристаништата во Белгија и Франција. Оттаму, гасот се транспортира до европската цевководна мрежа. И покрај агресивната војна на Русија, Путин заработува милијарди од овој извоз. Според студијата на еколошката организација Гринпис, Русија продолжува да заработува многу од своите енергетски договори со компании од Германија и други земји од ЕУ. Само во првите осум месеци од оваа година, 12,8 милијарди кубни метри руски течен гас се извезени во ЕУ, се вели во тековната студија, цитирана од АРД.
За целата 2021 година, т.е. пред почетокот на војната против Украина, количината изнесуваше 15,9 милијарди кубни метри. Само испораките на гас преку цевководи од Русија значително се намалија.
МНОГУ ПРИХОДИ ЗА РУСКАТА ВОЕНА КАСА Според „Гринпис“, само руската компанија „Јамал“ заработила околу 40 милијарди долари помеѓу 2022 и 2024 година, од кои платила 9,5 милијарди долари даноци во буџетот. Еколошката организација ги идентификува најважните клиенти на компанијата во ЕУ како францускиот енергетски концерн „Тотал Енерџис“, германската државна енергетска компанија „Сефе“ и шпанската „Натурџи“.
Ова значи дека „Тотал“ веројатно придонел 2,5 милијарди долари во приходите од корпоративен данок на Русија, „Сефе“ 1,45 милијарди долари, а „Натурџи“ 1,25 милијарди долари. Експертите на „Гринпис“ пресметале дека со 9,5 милијарди долари што ги придонел „Јамал“, Русија би можела да купи 271.000 дронови за напад „Шахед“ или 9,5 милиони артилериски гранати од 152 мм. Ова количество на гранати би била еквивалентна на три пати повеќе од годишното производство на Русија од околу три милиони гранати.
ПОВЕЌЕ ПАРИ ЗА РУСИЈА ОТКОЛКУ ЗА УКРАИНА Авторите на студијата сметаат дека е особено проблематично што четирите најважни земји увознички на руски течен гас – Франција, Шпанија, Белгија и Холандија – во периодот од 2022 до 2025 година дале повеќе пари за увоз на руски течен гас отколку што ѝ обезбедиле на Украина во форма на помош, забележува ARD.
Тие увезле руски течен гас во вредност од 34,3 милијарди евра, додека помошта за Украина изнесувала 21,2 милијарди, откриле и експертите на Гринпис. Авторите истакнуваат дека TotalEnergies има 20 проценти удел во Јамал, а се верува дека концернот одржува и добри лични односи со Владимир Путин, пишуваат и германските јавни медиуми.
За време на енергетската криза, TotalEnergies доби многу од овие контакти. Од 2022 година, концернот доби дивиденди од 5,06 милијарди долари од Јамал, велат проценките, како и дополнителни 1,74 милијарди долари дивиденди од Новатек.
ДОГОВОРИТЕ ЗА СНАБДУВАЊЕ СЕ ДОЛГОРОЧНИ Европските енергетски компании го објаснуваат својот близок однос со Јамал со тоа што потребите за енергија се големи и дека голем број обврски произлегуваат од долгорочните договори. Ова важи и за германската компанија Сефе. Поранешната „Газпром Германија“ беше подружница на рускиот државен концерн „Газпром“ и беше национализирана по рускиот напад врз Украина, објаснува АРД.
„Сефе“ е договорно обврзана кон Јамал до 2038 година. Германското Министерство за економија истакнува дека нема санкции против увозот на течен гас од Русија – затоа договорите мора да се исполнат.
УВОЗОТ ОД САД ИСТО ТАКА СОЗДАВА ЗАВИСНОСТ Експертите на „Гринпис“ ја критикуваат и растечката зависност од увоз на гас од САД. Зголемениот увоз на американски гас ја остава Европа изложена на политичките каприци на претседателот Доналд Трамп, кој се покажува како сè понесигурен партнер. Единствениот излез од „гасната стапица“ е Европа да ја прекине својата зависност од фосилниот гас и да се преориентира кон енергетски систем базиран на обновливи извори на енергија, заклучува ARD.
(АРД)
