БИЉАНА СЕКУЛОВСКА
Вакцините секако дека ја покажуваат и темната страна на политиката. Лошите проценки на ЕУ за количеството на производство и достапноста, дистрибуцијата на вакцините, доведоа до тешки зборови и обвинувања во лидерскиот европски камп, високи тонови кои заглушуваат. Но и заглупуваат
Колку да е смешно и забавно, секако дека е тажно што вакцините никако да пристигнат во земјава, па самиот Заев сега ја најави Кинеската Нова Година како крај на нашата агонија, откако Вучиќ и целата таа бурлеска од најавени данајски подароци во вид на вакцини- не пристигнаа на Табановце, заради несредена документација, којзнае зошто и којзнае како.
Но, вакцините секако дека ја покажуваат и темната страна на политиката. Лошите проценки на ЕУ за количеството на производство и достапноста, дистрибуцијата на вакцините, доведоа до тешки зборови и обвинувања во лидерскиот европски камп, високи тонови кои заглушуваат.
Но и заглупуваат, затоа што, видете го оној научен стручен конзилиум на Фејсбук, сите оние нобеловци кои со денови и недели и месеци крекаат, врескаат и маршираат, мавтаат со нивното сеопшто знаење и експертиза за сите нус појави, препорачани дози и несакани ефекти.
Се ќе дознаете и ќе се катапултирате директно во нобеловиот клуб ако ги одберете фејсбук патеките: за кинескиот мртов вирус според општиот консензус важи ставот дека е најдобар и затоа е и одобрен од ова високоумно царство. Да, сепак е најефикасна и најбезбедна таа вакцина, не е вештачко производство, важно клима фејсбук трустот на мозоци, кој притоа крши прсти што мора да се наведне главата над кинеското производство на самиот вирус, да се подголтне и занемари фактот што кинеските власти со месеци не дозволуваа влез во Вухан и во лабораторијата, но што е тоа сега важно, кинеските вакцини имаат големи шанси да не спасат од овој смртоносен поод на вирусот.
Па, одиме понатаму- потоа се прави вивисекција на руската вакина која предизвикува вистинска, драматична агонија- месец дена или 40 можеби, не смее да се пие алкохол, да се пуши, да се јаде масно, ако се сака да се преживее после убодот на кој е горд Путин.
Веднаш потоа, следуваат научни конференции на фејсбук мудреците, на тема- западните достигнувања на вакцините на Фајзер, Модерна и Астра Зенека- оние со алергии која од нив треба да избегнуваат, старосната граница како да се запази, дали се вештачка творба или природно чудо овие вакцини, се можете да дознаете и да се едуцирате од фејсбук научните великани.
Но, дали знаете, пришепнуваат тие, дека Куба има создадено вакцина, која како и лекот за ракот се чува во тајност- и двата лека вредат само 5 пари, а можеби и ништо, но западните политички сотони од типот на Гејтс, Сорос и масонските крвопијци кои чипираат, не дозволуваат пристап на излекување на човештвото.
И затоа сите овие фејсбук магови му се смеат и го исмеваат Заев затоа што од петни жили се обидува да објасни дека руските и кинеските вакцини не беа пожелни пред некоја недела во западното друштво на НАТО и ЕУ, за подоцна политичките интереси да сфатат дека мора да преовлада борбата за здравје и живот, како што и сама призна претседателката на Европската Комисија, Урсула фон дер Лајен.
Политиката не е игра за слабаци, но ниту за преценети суетни величини, тоа единствено мора да им се признае на прваците од фејсбук научниот клуб, тој престижен харвардски ѓаволски круг, во чиј вртлог кога еднаш ќе се влезе, никогаш повеќе не може да се избавите.
