БИЉАНА СЕКУЛОВСКА
Она што е важно да се потцрта, е фактот што во неговиот говор и тој не се иззема од тој срам, од она што, како тој вели – „го направивме (како политичари) досега”
Многу одамна требаше сериозно да се замислиме, но после вчерашната бројка од 50 починати луѓе од последици од Ковид-19, едно секако е сигурно. Луѓето мора да разберат дека вакцините се единствениот спас, еднакво како што се и маските, додека навистина сите не бидат вакцинирани и конечно, не се прогласи крај, на оваа мрачна, ужасна ера.
Затоа што, стравот од вакцините може да подразбира само страв од тоа да се живее понатаму, со сурови зборови- да се преживее, и веројатно затоа, по угледот на Бајден, кој изјавува дека има намера да ја вакцинира цела Америка, конечно тоа треба да го стори и Заев. Да соопшти дека така изгледа политика на национален спас – да се сфати дека ниту еден лидер, ниту закони, ниту еден попис, дијаспора, државјанство, ниту едни избори, ниту една националност, вера, религија, политичка ориентација, ништо од ова не преживува, во услови кога не се разбираат приоритетите во една земја.
Затоа што сега приоритет мора да бидат само животите на луѓето, само тоа и ништо повеќе, да се спасуваат голите животи, за навистина да има се ова смисол понатаму. За во иднина да има услови да се спроведе попис, таков, несовршен, со многу слабости и нелогичности, но конечно да почне некакво нормализирање, после поминатата тешка година на ненормалност во секоја смисла на зборот. Политички драми, обвинувања, нестабилност, неизвесност дали воопшто ќе дојде нов ден, опишани со вистинските зборови на претседателот Пендаровски – срам за државата.
Она што е важно да се потцрта, е фактот што во неговиот говор и тој не се иззема од тој срам, од она што, како тој вели- „го направивме (како политичари) досега”, што е резултат на незадоволство кај граѓаните, и токму затоа спасот го барале во вакцинирање во соседна Србија.
Ваквиот став на Пендаровски е веројатно преседан во политичката историја на оваа земја- да се преземе лична одговорност како политичар и да се соопшти тоа на јавноста, и покрај тоа што секако, иако е свесен за сопствените последици, го става на прво место доброто на граѓаните. Пендаровски ја соопшти најдобрата, воедно и прва лекција, која е дефиниција на политичарите- треба да се биде понизен кон граѓаните, да се служи исклучиво на нивните интереси, ништо помалку од тоа.
Онака како што Бајден ја води политиката на масовна имунизација во неговата земја, слично како што американската амбасадорка Брнс и заменик помошникот државен секретар Палмер им упатија порака на лидерите во оваа земја, кога побараа од нив да бидат конструктивни, затоа што само така може да функционира државата. Тоа беше порака на препорака за демократија- дека мора да се има на ум дека приоритет секогаш се граѓаните- затоа што, само така изгледа еден чесен политички живот- кога претставува чест да се биде во нивна служба.
Токму затоа, за да дојде до таа точка на пресврт, за да се случи тој попис околу кој се кршат копја со месеци, треба да биде спроведен врз основа на новите политики на Заев, оние на масовно вакцинирање, на борба за едукација на луѓето дека така може само да се дојде до ставање крај на пандемијата, на одбројување на деновите до смртта. За да не стане попис на оние што преживеале, додека ги гледале своите најблиски како ги молат останатите околу себе да стават маска, како молат за една вакцина, и на крај- како молат за воздух.
