Меѓу смената и смртта имало само неколку часови…
ЛАУРА ГОЗИ
Роман Старовоит, поранешниот министер за транспорт на Русија, беше пронајден мртов на 7 јули со сомнителна самонанесена прострелна рана, објави Истражниот комитет на земјата.
Околностите на инцидентот се утврдуваат, додадоа тие.
Порано истиот ден, Старовоит беше разрешен од рускиот претседател Владимир Путин, но не е познато од која причина. Наскоро беше објавено дека нов министер за транспорт ќе биде Андреј Никитин, заменик на Старовоит.
Роман Старовоит беше назначен за министер за транспорт во мај 2024 година, а претходно беше гувернер на Курската област шест години.
Курската област беше делумно заземена од украинските трупи во август 2024 година во изненадувачка офанзива.
Москва дури неодамна успеа да ги потисне украинските сили, иако на крајот на јуни Киев објави дека сè уште контролира мал дел од територијата во Русија.
Старовоит беше заменет како гувернер од Алексеј Смирнов, но тој остана на таа позиција кратко време. Тој беше уапсен во април 2025 година, а подоцна беше обвинет за проневера на пари наменети за изградба на утврдувања на границата со Украина.
Старовојт беше меѓу обвинетите, напиша тогаш рускиот весник „Комерсант“. Неговата смрт се случила „многу порано“, изјави за руската телевизиска станица RTVI Андреј Картаполов, шеф на Комитетот за одбрана на Државната дума.
Нешто порано, пред да биде објавена смртта на Старовојт, новинарите го прашаа Дмитриј Песков, портпаролот на Кремљ, дали неговото разрешување значи дека Путин ја изгубил довербата поради настаните во Курската област. „Губењето на довербата се споменува ако се случило. Таква формулација не е употребена во указот на Кремљ“, одговори Песков.
(BBC)
