БИЛЈАНА СЕКУЛОВСКА
Тие родители кои одбиваат да ги вакцинираат своите деца имаат свои светоназори, свои погледи на вистината. Особено, тоа е идејата дека научните факти се само романтичен поглед на овој хаотичен свет. Овие родители сметаат дека овој свет мора да се спаси од лудилото кое го предизвикува науката, а најдобар начин е да се запалат сите книги, да се снимат нивните коски додека офкаат, и да се пуштат овие крици и очајнички звуци на научниците, кои претходно мора да бидат заробени и фрлени во зандани
Суеверието е она мало зрнце надеж што ќе ја спаси Планетата од науката. Така размислуваат оние родители кои одбиваат вакцинации на своите деца, затоа што сметаат дека тие најдобро се знаат, за себе и за светот околу себе. A nајмногу знаат дека науката е само измислена, минлива крута и здодевна појава, која мора да се сосече од коренот. Потоа, таа наука мора да се запали во крпче и да се фрли со десното стопало зад левото рамо. Целата операција се извршува на зајдисонце, додека жабите крекаат и затоа треба да им се потсечат ноктите. Притоа, Земјината топка се огледа од реките, при што може да се забележи, доколку се гледа само со спуштени капаци, дека станува збор за плоча, а не топка, никако округла.
Тие родители кои одбиваат да ги вакцинираат своите деца имаат свои светоназори, свои погледи на вистината. Особено, тоа е идејата дека научните факти се само романтичен поглед на овој хаотичен свет.
Овие родители сметаат дека овој свет мора да се спаси од лудилото кое го предизвикува науката, а најдобар начин е да се запалат сите книги, да се снимат нивните коски додека офкаат, и да се пуштат овие крици и очајнички звуци на научниците, кои претходно мора да бидат заробени и фрлени во зандани, за да не го заведуваат кутрото светско население, кое потпаѓа со векови под нивното опасно влијание.
Освен тоа, родителите се бесни на министерот за здравство, Венко Филипче, кој апелира да се вакцинираат децата од морбили, стравувајќи дека епидемијата може да доведе до сериозни размери.
Министерот, какво разочарување за овие родители, безнадежно и наивно верува во научната мисла, во научните достигнувања, во процветот на интелигенцијата, откако, според родителите, некаква лажна и манипулативна историја, говори дека средниот век го запустил човештвото и затоа го добива средното име- мрачен. Тој, Венко Филипче, не им дозволува на родителите да се вратат во темните векови, со што, безочно и безобразно им ги крши основните човекови права и слободи- да живеат по своја волја, како на пуст остров, изолирани, весели хипи тинејџери, кои уживаат да ја голтаат секоја капка од овој сочен живот, макар тоа допринело до катастрофи од сериозни размери.
Но, дури и во 20.век, сметаат родителите, науката се поигрува со слободата на луѓето да прават што сакаат со своите, но и туѓи животи, особено да ја игнорираат таа наука, која нуди некакви поразителни факти. Така, можете да прочитате дека пред 1980 година, кога започнува имунизација, 2.6 милиони луѓе умреле од морбили, кога Светската здравствена организација пред себе дава задача да се намали бројот на смртни случаи кај децата за две третини.
Да, секако дека е најдобро министерот Филипче да даде оставка, а на негово место да дојде светски познат пророк, кој ќе ги лечи сите болести и тегоби со допир на главата и фиксирање на погледот со часови, трениран од видеата на Марина Абрамовиќ, додека течат и капат крвави солзи на Великата Госпа од Меѓумурје, а Малата и ги брише со светло сина кутија Арф. За тоа време, родителите ќе продолжат да се крстат во иконите кои ги постираат на Фејсбук, но, кутрите тие не знаат, дека дури ни светците во случаи како нив не помагаат.
Филипче и науката воопшто, знаат само банални, неупотребливи методи- да ги лечат незнаењето, неинформираноста и ступидноста во 21.век, наместо галантно да им се придружат на големите умови од пророци и заедно да ни баат и гатаат во суморните предвечерни часови, кога крекаат жабите и ни соопштуваат дека сме доживеале незгоден пех. Каква штета-сме го исчашиле левото рамо и немаме добра позиција за фрлање на ноктите на жабата, која дури и таа не подгледнува загрижено, дали доброволно сме го поматиле умот или сме платиле сериозна сума некоја гледачка да ни ја соопшти таа жална вест и да не напушти, затоа што сме станале неупотребливи дури и за неа.
