По повод овие инциденти, Цивил бара од сите релевантни чинители итно да преземат чекори за зајакнување на напорите за промовирање на меѓуетничката и меѓукултурната толеранција, преку сеопфатна едукација и поддршка на младите за отфрлање на реториката на омраза
Центарот за слобода како организација и јас лично го осудуваме вандалскиот чин со кое се запали македонското знаме. Сметам дека е за крајна осуда таквото однесување. Во палењето знаме нема ништо достоинствено. Вие, ако на ден на знаме на една нација палите знаме на која и да било држава а уште пострашно во овој случај државата во која вие живеете, тоа значи дека вие не го почитувате ниту своето знаме. Тоа е чин кој за мене е крајно недозволив – вели претседателот на Цивил Џабир Дерала при неговото гостување во „Слободен печат“.
– Она што можевме да го видиме во вандалскиот чин но и и по брзата реакција на институциите е дека станува збор за млади луѓе па дури и малолетници. Длабоко вознемирувачки е да се биде сведок на вакви инциденти, но уште посериозно е тоа што се врши експлоатација на младите за ширење на деструктивни идеологии и пораки кои ги упатуваат пред сè политичките ентитети во земјава кои се вистински одговорни за настанот – посочи првиот човек на Цивил Дерала и дополнува дека постои Закон по кој за одредената возраст треба да дејствува и да се санкционира одреденото поведение.
Претседателот на Цивил Дерала ги повикува сите одговорни институции, лидерите во заедниците, но и родителите, просветните работници, граѓанските организации и сите одговорни и достоинствени луѓе да преземат итни мерки за промовирање на толеранцијата и да преземат итни чекори за интензивна едукација против омразата по која било основа.
Инаку Цивил – Центар за слобода издаде и соопштение каде остро и недвосмислено ги осудува инцидентите со палење на државното знаме во кои беа инволвирани млади луѓе, вклучително и малолетници, под влијание на опасната националистичка реторика. Овие дела не само што симболизираат деструктивност и непочитување на принципите на соживотот и мултикултурализмот, туку и ја продлабочуваат омразата и поделеноста во нашето општество.
Длабоко вознемирувачки е да се биде сведок на вакви инциденти, но уште посериозно е тоа што се врши експлоатација на младите за ширење на деструктивни идеологии.
Цивил ги повикува сите одговорни институции, лидерите во заедниците, но и родителите, просветните работници, граѓанските организации и сите одговорни и достоинствени луѓе да преземат итни мерки за промовирање на толеранцијата и да преземат итни чекори за интензивна едукација против омразата по било која основа. Општеството и државата се обврзани да го заштитат правниот поредок и да ги земат на одговорност сите прекршители на законот. Истовремено, институциите и општествените чинители имаат обврска да ги заштитат децата и младите од штетната пропаганда.
Цивил ги осудува и политичките профитери кои, наместо да понудат решенија, ги искористија инцидентите со палењето на македонското знаме за дневни политички поени, во изјави што содржат осуда, но истовремено упатија и инфламаторни, поларизирачки пораки. Тоа придонесе кон одговор од „другата страна“ и дополнителни инциденти со палење на албанското знаме, но и насилство во кое, според досега познатите податоци, еден млад човек беше претепан.
Цивил во своето 25 годишно постоење континуирано работи на унапредување на мултикултурализмот и почитувањето на различностите во земјата, во регионот и глобално. По повод овие инциденти, Цивил бара од сите релевантни чинители итно да преземат чекори за зајакнување на напорите за промовирање на меѓуетничката и меѓукултурната толеранција, преку сеопфатна едукација и поддршка на младите за отфрлање на реториката на омраза. Граѓанското општество, образовните институции, и медиумите мора да соработуваат за да создадат амбиент во кој младите ќе бидат ослободени од влијанието на деструктивните пропаганди.
Истовремено, Цивил инсистира на правна и институционална реакција кон сите кои поттикнуваат или учествуваат во акти на омраза, вклучувајќи ги и оние кои ги злоупотребуваат инцидентите за политичка манипулација и поларизација. Само преку обединување на сите чинители, може да се спречат понатамошни насилства и да се заштитат вредностите на мултикултурализмот, соживотот и демократските вредности.
