Прилеп има однегувано бројна и добра театарска публика. Тоа се покажа и на годинашниот фестивал – речиси за секоја претстава се бараше „билет повеќе“ а имаше и такви кои „од нога“ ги следеа претставите кои беа нивен интерес
ЛИЛЈАНА МАЗОВА
Македонскиот театарски фестивал „Војдан Чернодрински“ традиционално и годинава се одржа во Прилеп. За годинашниот фестивал, што се одржа од 7 до 15 јуни, уметничката директорка и селекторка Катерина Коцевска, одбра осум претстави и една (последната) во чест на наградените. Сето она што беше предвидено се одржа: претставите, тркалезните маси, промоции, презентации.
На самиот почеток на Фестивалот беа доделени и традиционалните награди за животно дело: на режисерот Владимир Милчин и на актерот Бајруш Мјаку, за кои одлучуваше Советот на фестивалот.
Жирито во состав Бедиа Беговска, претседател, и членовите Љиљана Богојевиќ и Маја Вељковиќ, сите три актерки, ги додели следните награди:
– Најдобра претстава во целина беше прогласена Бакхи – краток преглед на распадот во режија на Игор Вук Торбица на Битолскиот театар; претставата му донесе награда и на режисерот во неговата категорија!;
– наградата за женска главна улога и припадна на Марија Спиркоска Илијески за улогата на Велика во претставата Пиреј на НТ во Прилеп;
– наградата за главната машка улога ја доби актерот од истата претстава Александар Степанулески за улогата на Јон.
Наградата за женска споредна улога и припадна на Билјана Драгичевиќ – Пројковска за улогата на Карлота во претствата Странци на Драмски театар (воопшто не е епизодна улога!), за споредна машка улога наградата му припадна на Гзим Жерка за улогата на Сен Жист во претставата Смртта на Дантон на Албанскиот театар – Скопје, наградата за најдобра млада актерка и припадна на Симона Димковска која игра три лика во претставата Физика на тагата и е продукција на НТ во Куманово, наградата за млад актер ја доби Тони Денковски за ликот на Горниот во претставата На отворено на Театар Комедија – Скопје, наградата за музика му припадна на Димитар Андоновски за претставите Пиреј и На отворено, наградата за сценографија на Константин Трпеновски за претставата Макбет, наградата за современа сценска драматизација на режисерот Љупчо Ѓоргиевски за Животинска фарма, продукција на НТ „Антон Панов“ во Струмица.
Наградата за најдобар рекламен материјал му припадна на Нгадњим Мехмети , за кореографија и сценски движења ја доби Ѓерѓ Превази (Смртта на Дантон), а за костим Роза Трајчевска Ристовска.
Некој друг состав на фестивалско жири веројатно ќе донесеше други одлуки.
Наградата за најдобра претстава според гласовите на публиката му припадна аа Народниот театар во Прилеп за претставата Пиреј од Петре М. Андреевски во режија на Љупчо Ѓеорѓиевски.
Прилеп има однегувано бројна и добра театарска публика. Тоа се покажа и на годинашниот фестивал – речиси за секоја претстава се бараше „билет повеќе“ а имаше и такви кои „од нога“ ги следеа претставите кои беа нивен интерес.
Селекцијата, или претставите одбрани во конкуренција за наградите, секогаш зависеле од понудата или репертоарот на театрите меѓу два фестивала „Војдан Чернодрински“. И од фактот/целта/замислата на селекторот што сака да покажа/прикаже.
Годинава Фестивалот имаше свое „мото“ – ОВА Е НАШЕ ВРЕМЕ! ВРЕМЕ ЗА ТЕАТАР., што го одбра/реализира селекторката Коцевска.
Фестивалското мото, низ прикажаното во официјалната програма и онаа придружната, се разбира, ги отслика состојбите/репертоарот на театрите во Макадонија. Коцевска не само што „состави“ програма која го прикажа сегашниот театарски миг во Македониаја, туку успеа и да ги врати/оживее разговори на тркалезната маса што успешно и со години ги води пороф.др Ана Стојановска.
Годинава, пак на иницијатива на Коцевска, што најмногу се почувствува на разгиоворите за претставите на фестивалот, присуствуваа и критичари/гости вон Македонија, со што тој доби поширока афирмација.
ОВА Е НАШЕ ВРЕМЕ! ВРЕМЕ ЗА ТЕАТАР, сосем добро го „одигра“ своето време.
Некој кажа дека веќе се чека идното издание – во јуни следната година. И којзнае дали тука и сега е место да се вратиме на една стара идеја: Фестивалот секоја година да се држи во друг град зашто, нели, им припаѓа на сите што сакаат театар. Сепак, чинам, дека тое е речиси невозможно. Од повеќе причини. Над и пред сите затоа не само што има простор за сите различни содржини, туку и затоа што на него работат луѓе кои добро ги реализираат истите и секогаш се отворени за соработка и внесување на нови идеи.
Во секој случај, да повторам, оваа година видовме/проследивме/учествувавме на фестивал што се одвиваше како добро осмислен и добро реализиран. Дел од содржината, на пример, беше и вклучувањето на Македонскиот центар ИТИ како и EURODRAM – Европска мрежа за драмски превод: презентација и награди за 2019 година…
