Три романи се во најтесниот избор за наградата „Роман на годината“- „Простување“ од Кица Колбе („Или-или“), „Светот што го избрав“ од Калина Малеска („Или-или“) и „И ѕирка и проѕирка“ од Огнена Никуљски („Антолог“). Конечниот избор е во петок на позната адреса – во „Буква“
„Простување“ од Кица Колбе („Или-или“), „Светот што го избрав“ од Калина Малеска („Или-или“) и „И ѕирка и проѕирка“ од Огнена Никуљски („Антолог“) се трите романи што влегоа во најтесниот избор за годинашната награда „Роман на годината“, што ја доделува Фондацијата за унапредување и промоција на културните вредности „Славко Јаневски“. Ова го реши жири-комисијата во состав: Лидија Димковска (минатогодишна лауреатка и претседателка на жирито), Маја Бојаџиевска, Ѓоко Здравески, Андреј Ал-Асади и Катерина Богоева (претставничка на Фондацијата).
Насловот на победничкиот роман ќе биде соопштен на прес-конференција на 14 март (петок) што ќе се одржи во кафе-книжарницата „Буква“ во Скопје, со почеток во 12 часот.
На конкурсот за наградата „Роман на годината“ годинава се пријавија 43 романи, а жири-комисијата преку неколку селекции стаса до најтесниот избор. Како една од спецификите на годинашниот конкурс е фактот дека во најтесниот избор влегоа романи напишани од авторки, што е своевиден куриозитет во историјата на наградата.
Наградата „Роман на годината“ за 2024 година, чиј генерален покровител е „Комерцијална банка“ АД Скопје, а е и поддржана од Министерството за култура и туризам на Република Северна Македонија, се состои од плакета, статуетка и паричен износ од 150.000 денари што го добива авторот, во случајот авторката, на победничкиот роман.
Наградата „Роман на годината“ годинава се доделува по 26-ти пат, а свеченото врачување ќе се одржи кон средината на мај.
Како што објавивме воминатиот број меѓу конкурентите упадливо има доста професори. Најпрвин тука е професорката во пензија Огнена Никуљски (73), професор по шпански јазик и преведувач и ќерка на познатиот пиосател Коле Чашуле. Калина Малеска ( 50) пак е професор на Филолошкиот факултет и е ќерка на двајца професори – нејзин татко е познатиот дипломат и професор на Правниот – Денко Малески, но мајката Мирјана е исто така универзитетски професор. Претходната добитничка на наградата „Славнко Јаневски“ Кице Колбе (74), родена Барџиева веќе имаше доста изданија со кои беше во конкуренција во минатото а за „Снегот во Казабланка“ ја доби наградата во 2006 година. И таа беше дел од наставничкиот корпус на Филолошкиот факултет на катедрата за филозофија.
