Додека светот ги очекуваше резултатите од критичните избори во Унгарија, Словенија се најде во фаза на постизборно пазарење за формирање мнозинство и влада во земјата
Словенија влезе во клучната недела од процесот за формирање нова влада, откако конститутивната седница на Парламентот на 10 април го потврди длабоко фрагментираниот политички пејзаж. Додека мандатарот Роберт Голоб се обидува да состави „Влада на национално единство“, земјата се соочува со сериозни предизвици – од истраги за странско мешање во изборите, до рекорден скок на цените на горивата.
Најголемото изненадување по изборите е изборот на Зоран Стевановиќ, лидерот на анти-естаблишмент партијата Ресни.ца (Resni.ca), за претседател на Државниот збор (парламентот). Со 48 гласа „за“, Стевановиќ стана фигурата која ги спојува спротивставените блокови, што многу аналитичари го толкуваат како стратешки компромис на Голоб за да го обезбеди патот до неопходните 46 пратенички гласа за идната влада.
Актуелниот премиер и лидер на Движењето Слобода (GS), Роберт Голоб, ги интензивираше преговорите со партијата Демократи (DEM) на Анже Логар. Неговата понуда се темели на економската програма „Амбициозна Словенија“, чија цел е ублажување на последиците од глобалните конфликти.
Од друга страна, Јанез Јанша (СДС) останува во остра опозиција, продолжувајќи да ја оспорува легитимноста на изборните резултати поради наводни нерегуларности, иако претседателката Наташа Пирц Мусар веќе ги отфрли тие тврдења како неосновани.
Постизборниот период е во сенка на сериозната истрага за странско мешање. Националното биро за истраги (НПУ) вчера прими докази за наводни операции на приватната разузнавачка фирма Black Cube, која спроведувала кампањи за дискредитација на политички фигури за време на изборниот процес. Голоб веќе го извести Брисел, карактеризирајќи го случајот како „директна хибридна закана за европските демократски стандарди“.
Додека траат политичките преговори, граѓаните на Словенија се соочуваат со економски шок. На 10 април, цената на дизелот на регулираниот пазар достигна рекордни 1,89 евра за литар. Овој пораст, предизвикан од тензиите на Блискиот Исток, стана главен адут на опозицијата која бара итни мерки и ја користи економската нестабилност за да го забави процесот на формирање влада.
До крајот на април, претседателката Пирц Мусар ќе го заврши вториот круг официјални консултации. Краен рок за официјално номинирање на кандидатот за нов мандатар на владата е 10 мај. Словенија се наоѓа на крстопат меѓу стабилна проевропска коалиција и политички ќор-сокак што би можел да доведе до нови избори во текот на летото.
(civilmdia.mk)
