Војната со Иран досега ја чинеше Америка 37,5 милијарди долари, вели министерот за одбрана. Сега се бараат нови 87 милијарди од буџетот
СЕРЕН ХАБИШИЈАНИ – ГЕРИ ОД ДОНЕХЈУ
Војната со Иран досега ги чинеше Соединетите Држави (САД) околу 37,5 милијарди долари (33 милијарди евра), што е речиси 8 милијарди долари повеќе од последната проценка направена во мај, изјави министерот за одбрана Пит Хегсет. Пред Буџетскиот комитет на Конгресот, Хегсет побара дополнителни средства.
Законодавците итно треба да одобрат дополнителни 87 милијарди долари финансирање за Пентагон, од кои 67 милијарди се наменети за операции на Блискиот Исток, изјави секретарот за одбрана – или секретар за војна, како што администрацијата на Доналд Трамп го преименуваше одделот.
Во април, Белата куќа побара од Конгресот 1,5 трилиони долари за Пентагон за следната фискална година, со што американските воени трошоци би се искачиле на рекордно ниво во модерната ера.
Говорот на Хегсет на Капитол Хил беше неколку пати прекинуван од антивоени демонстранти, а заврши со расправија меѓу секретарот за одбрана и еден сенатор.
Ова беше прво обраќање на Хегсет пред конгресмените откако неодамна беше обновена војната меѓу САД и Иран. Нападите на Иран врз земјите од Персискиот Залив, кои тој ги смета за сојузници на САД, уследија како одговор на претходните американски воздушни напади низ Иран.
Америка и Иран постигнаа договор за примирје, односно Меморандум за разбирање, во средината на јуни, но тој беше прекршен по само две недели – или, како што рече Трамп: „Примирјето повеќе не е во сила“, при што ги нарече иранските лидери „злобници, болни луѓе и олош“.
Колкава беше цената на војната и колку американски војници загинаа?
На 22 јули, САД ги продолжија нападите врз Иран 11-ти ден по ред, а иранската армија повторно возврати со удари врз американските воени бази и базите на нивните сојузници на Блискиот Исток.
Од почетокот на обновените судири, потврдено е дека загинале тројца американски војници од силите распоредени во земјите од Персискиот Залив, каде што САД имаат воени бази. Од почетокот на американско-израелските напади врз Иран на 28 февруари и иранските возвратени удари, загинале вкупно 18 американски војници, соопшти Трамп.
„Живееме во опасен свет“, им рече Хегсет на конгресмените, додавајќи дека тоа бара храбра и брза акција.
Откако беше прекинат од демонстранти, Хегсет продолжи, истакнувајќи дека неговото барање за дополнителни средства доаѓа во критичен момент. „Без овие средства, се соочуваме со сериозен недостиг што ја загрозува нашата способност да им исплаќаме плати на припадниците на американската војска, брзо да ја надополнуваме опремата и муницијата и непречено да ги спроведуваме виталните операции“, рече Хегсет.
Секој долар што ќе се издвои, додаде тој, ќе се искористи за зајакнување на „смртоносната моќ“ на американските воени сили и за „унапредување на мирот преку сила“. Претседателката на Сенатскиот комитет за распределба на буџетски средства, републиканката Сузан Колинс, го праша Хегсет што би се случило доколку нема дополнителни средства. Хегсет одговори дека ќе мора да се намали тековната и идната обука на војниците. Тој постојано ја обвинуваше администрацијата на поранешниот претседател Џозеф Бајден за недоволно вложување во војската.
Пети Мари, водечката претставничка на Демократската партија во конгресниот комитет, го отфрли барањето за дополнителни средства, велејќи дека тоа „нема многу смисла“.
На прашањето од демократскиот сенатор Дик Дурбин дали има проценка колку досега чинела војната во Иран, Хегсет ја наведе сумата од 37,5 милијарди долари.
Два извора од Демократската партија и трет извор запознаен со ситуацијата изјавија за CBS, медиумскиот партнер на Би-би-си во САД, дека сметаат оти реалната цена на војната во Иран е многу повисока. Тие додадоа дека тековната проценка не ги вклучува другите трошоци, како што е обновувањето на оштетените американски бази.
Заклучно со 12 мај, не постоеше официјална владина проценка за финансиските трошоци на САД во војната против Иран. Висок претставник на Пентагон изнесе податок дека досега за војната се потрошени 29 милијарди долари.
Претставници на Пентагон, врховната воена команда на САД, претходно ги информираа конгресмените дека само во првата недела војната ја чинела земјата околу 11,3 милијарди долари (околу 10 милијарди евра).
Шефот на Пентагон тврдеше дека, доколку биде одобрено, барањето за финансирање би претставувало „инвестиција за генерациите“, која би осигурила САД да не мораат да „го надоместуваат заостанувањето“ зад воените сили на другите земји.
Кирстен Џилибранд, демократска сенаторка од Њујорк, ја обвини администрацијата на Трамп дека бара од Конгресот „неограничени средства за бомби“ додека американските граѓани не можат да си дозволат да ги „прехранат своите семејства“.
Таа праша зошто Хегсет бара десетици милијарди долари за војна за која претседателот изјавил дека е веќе добиена.
Сослушувањето кулминираше со расправа меѓу Хегсет и демократскиот сенатор Гери Питерс.
Питерс го нарече Хегсет „неуспех“ и изјави дека администрацијата на Трамп создала уште една „бесконечна војна“.
„Срам да ви е“, остро му се обрати Хегсет на Питерс.
„Сенаторот од Мичиген боледува од синдром на опсесија со Трамп“, додаде министерот за одбрана.
Антиамерикански постер во центарот на Техеран на кој се прикажани Трамп и членови на неговото семејство.
Повеќето членови на Конгресот од Демократската партија се противат на барањето Министерството за одбрана да добие повеќе средства од буџетот, но незадоволство постои и меѓу републиканците.
Некои од главните застапници за дополнително финансирање во Републиканската партија сакаат да се намалат трошоците во одредени други области, а тие средства да се пренасочат кон Министерството за одбрана.
Проблемот за администрацијата на Трамп е тоа што двата дома на Конгресот – Претставничкиот дом и Сенатот – нема да заседаваат повторно сè до септември.
Дури и ако републиканците успеат да ги обезбедат потребните гласови, ќе поминат месеци пред Пентагон да ги добие средствата.
За време на сослушувањето на Хегсет, Трамп, кој се наоѓаше во Белата куќа, објави список на подолгите и покрвави војни на Америка, истакнувајќи го нивното времетраење и бројот на жртви.
На својата мрежа „Truth Social“, тој напиша дека досега загинале 18 Американци во војната на САД со Иран.
(BBC, опремата е на Глобус)
