Атмосферата во Бугарија е таква што дури и интервјуто на Заев се смета за недоволно, иако тоа е непријатно за македонаската јавност! – вели истакнатиот бугарски професор за „Утрински брифинг“
Политичката психологија во Бугарија во моментов не е спремна на ништо помалку од некој тип на садистички однос. Во таа смисла интервјуто на Заев не е ни доволно радикално од бугарска перспектива. На некој начин може да се гледа како некој тип на додворување на бугарската позиција, но ако ги гледате ставовите на Каракачанов, ова не е доволно за бугарската страна, колку и да непријатно звучи за македонската јавност, изјави во „Утрински брифинг“ на „Слободна ТВ“ д-р Станимир Панајотов, постдокторант во Центарот за академски истражувања во Софија и визитинг професор во Институтот за општествени и хуманистички науки во Скопје.
– Во текот на транзицијата имавме разно-разни типови на национализми и популизми. Исто како што се прашувате за „феноменот“ Каракачанов во Бугарија, за време на владеење на ВМРО-ДПМНЕ во Македонија сите во Бугарија се прашуваа како може да го имате Груевски. Значи прашањето е како е можно генерално на Балканот да се нема голем поглед на историјата. Каракачанов е одраз на историска школа во Бугарија, која за жал не може да гледа во иднината. Историјата не е нешто што треба да гледа само во минатото. Може да не ни се свиѓа Каракачанов, но за жал тоа е мејнстрим позицијата во Бугарија. И колку да е чудно и непријатно тој зборува како репрезент на бугарската политика, вели Панајотов.
– Се работи за внатрешно-политичка анксиозност која има историски корен, но најбитно е дека ветото и неговата внатрешно-политичка историја има сопствена ситуираност во конкретниот момент и тој конкретен момент е погоден за тоа вето. Во конкретниот историски момент околностите и дозволуваат на Бугарија да може дипломатски да се изживува преку ситно-колонијален тип на политика и дипломатија. Едноставно, лоша е ситуацијата за Северна Македонија, погодна е ситуацијата за такво вето, ситуацијата на ЕУ е доста лоша и Бугарија може да демонстрира „хајдуклук“, вели Панајотов и додава дека ова нема да и се исплати на Бугарија, бидејќи е осамена во своите ставови.
